ގަލޮޅު އުތުރު ދާއިރާގެ މެންބަރު އީވާ އަބްދުﷲ މަޖިލީހުގެ ނައިބް ރައީސް ކަމުން ވަކިކުރުމަށް ރައްޔިތުންގެ މަޖިލީހުގެ 50 މެންބަރުގެ ސޮޔާއި އެކު މިއަދު މަޖިލީހުގެ އިދާރާއަށް ހުށައަޅައިފިއެވެ.
އިވާ ވަކިކުރުމަށް ސޮއި ކޮއްފައިވަނީ އެމްޑީޕީގެ 49 މެންބަރުނާއި ނޮޅިވަރަމް ދާއިރާގެ މެންބަރު މުހައްމަދު ނަޝީދު އަބްދުﷲއެވެ.
މަޖިލީހުގެ ނައިބުރައީސްކަމުން އީވާ ވަކިކުރަން އެމްޑީޕީން ހުށަހެޅި އިރު މަޖިލީހުގެ ރައީސް މުހައްމަދު ނަޝީދު މަގާމުން ވަކިކުރަން އެމްޑީޕީން ހުށަހެޅި މައްސަލަ އިއްޔެއާއި މިއަދު ވެސް މަޖިލީހަށް އެޖެންޑާކުރި އެވެ. އެހެން ނަމަވެސް އެ މައްސަލަ އިއްޔެއާއި މިއަދު ވެސް ކުރިއަށް ގެންދެވޭ ގޮތް ނުވީ އެމްޑީޕީން ތުހުމަތުކުރާ ގޮތުގައި ނައިބު ރައީސް އީވާ ހުރަސް އަޅުއްވާތީ އެވެ.
ނަޝީދު ވަކިކުރަން އެމްޑީޕީން ހުށަހެޅި ގަރާރާ މެދު އީވާއާއި އަފީފު އަމަލުކުރެއްވި ގޮތުގެ ކަންބޮޑުވުމާ އެކު މަޖިލީހުގެ އިމްތިޔާޒާއި ސުލޫކު ކޮމިޓީން އިއްޔެ ބައްދަލުވުމެއް ބޭއްވި އެވެ. އެ ކޮމިޓީން ނިންމީ ގަރާރު ބޭރުކޮށްލީ ގަވައިދާ ހިލާފަށް ކަމަށާއި މަޖިލީހުގެ ނައިބުރައީސް އީވާ އަބްދުﷲ އާއި ވިލުފުށި ދާއިރާގެ މެމްބަރު ހަސަން އަފީފު މެމްބަރުންގެ އިމްތިޔާޒްތަކަށް އަރައިގަތް ކަމަށެވެ.
