ބައެެއް ނިންމުންތައް އޮމްބަޑްސްމަނުންގެ ނުފޫޒު ބޭނުންކޮށްގެން ބަދަލުކުރާ ކަމުގެ ޝަކުވާ އެންޓި ކޮރަޕްޝަން ކޮމިޝަން (އޭސީސީ) އަށް ހުށަހަޅާފައިވާތީ އެކަން ތަހުގީގުކުރުމަށް އެ ކޮމިޝަނުން އިންތިގާލީ އިންސާފުގެ އޮމްބަޑްސްޕާސަން އޮފީހަށް ވަދެއްޖެ އެވެ.
އޭސީސީން ތަހުގީގު ކުރަމުން އަންނަނީ އެ ކޮމިޝަނުން ނިންމާފައިވާ ބައެއް ތަހުގީގުތަކުގެ ނިންމުންތަކާއި ރިޕޯޓުތަކެއް ހުށަހެޅި އަދި ފާސްކުރި ތާރީހު ބަދަލުކުރި ކަމަށް ބުނާ މައްސަލައެއްގަ އެވެ. މިފަދަ މައްސަލަތެކެއްގެ ތުހުމަތުކޮށް ނޮވެމްބަރު 13، ގައި އިންތިގާލީ އިންސާފުގެ އޮފީހުގެ އޮމްބަޑްސްޕާސަން ޖިހާދާ އަނީސް ވަނީ އެ މަގާމުން އިސްތިއުފާ ވެސް ދެއްވާފަ އެވެ.
އިންތިގާލީ އިންސާފުގެ އޮފީހުގައި މަސައްކަތްކުރައްވަން ޖެހިވަޑައިގެންނެވީ ގިނަ ގޮންޖެހުންތަކަކާ އެކު ކަމަށާއި އޮމްބަޑްސްޕާސަންގެ މަގާމުގައި ތިއްބެވި އެހެން ބޭފުޅުން މަސައްކަތްކުރައްވަމުން ގެންދަވަނީ މާ ބޮޑެތި ލުއިތަކަކާއެކު ކަމަށާއި މައްސަލަތައް ނުނިންމައި ދިގު ދެންމުމަށް ފަހު ދައުރު ނިމެން ދެ ހަފްތާއަށް ވެފައިވަނިކޮށް ގަވައިދުތަކާއި ތަހުގީގުކުރުމުގެ އުސޫލުތަކާ ހިލާފަށް ކުއްލިއަކަށް މަސައްކަތްތައް ނިންމަން ފަށައި، ކުރިން ނިންމާފައިވާ ބައެއް މައްސަލަތަކުގެ ނިންމުން ބަދަލުކޮށްފައިވާ ކަމަށް ތުހުމަތު ޖިހާދާ ވަނީ ކުރައްވާފައެވެ.
އަންނަ ދައުރުން ފެށިގެން އިންތިގާލީ އިންސާފުގެ އޮމްބަޑްސްޕާސަން އޮފީހުގެ މަސައްކަތްތައް ކުރިއަށް ގެންދަން ހަމަޖެހިފައިމުވުމާއި ގުޅިގެން އަންނަ އަހަރަށް ލަފާކޮށް ފިނޭންސް މިނިސްޓްރީން ރައްޔިތުންގެ މަޖިލީހަށް ފޮނުވާފައިވާ ބަޖެޓު ފޮތުގައި، ދައުލަތުގެ ވުޒާރާތަކާއި މުއައްސަސާތަކަށް ކަނޑައަޅާފައިވާ އަދަދުތައް ބަޔާންކޮށްފައިވާ ސަފުހާތަކުގައި އިންތިގާލީ އިންސާފުގެ އޮފީހުގެ ނަމެއްނެތެވެ.
1 ޖަނަވަރީ 1953 އިން ފެށިގެން 17 ނޮވެންބަރު 2018 އާ ހަމައަށް ހިނގާފައިވާ އެފަދަ މައްސަލަތައް ބެލުމަށް އިންތިގާލީ އިންސާފުގެ އޮމްބަޑްސްޕާސަންގެ އޮފީހަށް ވަނީ ހަވާލުކުރެވިފައެވެ. އިންތިގާލީ އިންސާފުގެ ގާނޫނު ފާސްކުރީ ރާއްޖޭގައި އެންމެ ފަހުން އޮތް ފަސް ވެރިކަމެއްގައި ދިވެހިންނަށް ލިބުނު އަނިޔާތަކަށް އިންސާފު ހޯދައިދިނުމުގެ މަގުސަދުގަ އެވެ. ފުރަތަމަ މި ގާނޫނު ހުށައެޅި އިރު އޮތީ 2012 އިން، 2018 ގެ ނިޔަލަށް، ގަނޫނާ ހިލާފަށް މީހުންނާ ދެކޮޅަށް ހިންގާފައިވާ އަނިޔާތައް ބަލައި، އިންސާފު ހޯދައިނުމެވެ. އެކަމަކު މަޖިލިހުން ނޮވެމްބަރު 29، 2020ގައި ގާނޫނު ފާސްކުރީ އެއަށް ވުރެ މާ ފުޅާކޮށް، 65 އަހަރުގެ މުއްދަތެއް ހިމަނައިގެންނެވެ.
