ވެރިކަމުގެ ފުރަތަމަ 100 ދުވަހުގެ ތެރޭގައި ރާއްޖޭގެ ދެކުނު ކަނޑުގެ ސަރަހައްދުން ބައެއް ގެއްލޭ ގޮތަށް އިންޓަނޭޝަނަލް ޓްރައިބިއުނަލް ފޯ ދަ ލޯ އޮފް ދަ ސީ (އިޓްލޮސް) އިން ކޮށްފައިވާ ހުކުމް އިސްތިއުނާފުކުރަން ހުށައަޅާނެކަމަށް އިންތިހާބީ ރައީސް ޑރ. މުހައްމަދު މުއިއްޒު ވިދާޅުވެއްޖެއެވެ.

ރާއްޖެއާއި ޗާގޯސް އައިލޭންޑްސްއާ ދެމެދު އިން ކަނޑައަޅަން އިޓްލޮސްއަށް ހުށަހެޅި މައްސަލައިގައި އެ ޓްރައިބިއުނަލުން ވަނީ، އެ ރަށްތަކުގެ މައްޗަށް މޮރިޝަސް އަށް ސިޔާދަތީ ބާރު އޮތް ކަމަށް ކަނޑައަޅާއި، މޮރިޝަސް އާއި ރާއްޖެއާ ދެމެދު ފުށުއަރާ 95،000 އަކަ ކިލޯމީޓަރުގެ ސަރަހައްދެއް ބައިކޮށްފައެވެ.

ރައީސް އިބްރާހިމް މުހައްމަދު ސޯލިހު ގެ ސަރުކާރުން ފޮނުއްވެވި ސިޓީފުޅަކާ ގުޅިގެން ރާއްޖެއަށް ގެއްލުނު ބަޔެއް ކަމަށް އިދިކޮޅުން އަންނަނީ ބުނަމުންނެވެ. އިޓްލޮސްގެ ނިންމުމުގެ މައްސަލައަކީ ރައީސް ސޯލިހުގެ ސަރުކާރަށް ގިނަ ގޮންޖެހުންތަކަކާ ކުރިމަތިލާން ޖެހުނު ކަމެކެވެ.އަދި މި މައްސަލައިގައި އޭރު ސަރުކާރު ކޯލިޝަންގައި ތިބި ޕާޓީތަކުން ވެސް ވަނީ ކަންބޮޑުވެ، ސަރުކާރާ ދެކޮޅުވެފައެވެ.

މިރޭ އިއުލާންކުރެއްވި މުއިއްޒުގެ ފުރަތަމަ 100 ދުވަހުގެ ޕްލޭންގެ “ހަފުތާ 14” ގައި ވަނީ ފުރަތަމަ 100 ދުވަހުގެ ތެރޭގައި އެ މައްސަލަ އިސްތިއުނާފަަށް ހުށަހަޅާނެ ކަމަށް ބަޔާންކޮށްފައެވެ