ރައީސުލްޖުމްހޫރިއްޔާއަށް ލާމަރުކަޒީ ޤާނޫނުން ލިބިދޭ ބާރުގެ ދަށުން ކ.ގުޅީ އިޙްތިސާސުގެ ތެރޭގައި އޮތް ފުށިދިއްގަރު ފަޅު އެރަށުގެ އިޙްތިސާސުން ވަކިކުރައްވައިފިއެވެ. މިގޮތަށް ނިންމަވާފައިވަނީ ރައީސުލްޖުމްހޫރިއްޔާ މިއަދު ނެރުއްވި ޤަރާރަކުންނެވެ.
ރައީސް ޑރ. މުޙައްމަދު މުޢިއްޒުގެ ސަރުކާރުގެ އެންމެ މުހިންމު ވަޢުދު އަދި އެންމެ ބޮޑު އެއް މަޝްރޫޢަކީ ފުށިދިއްގަރު ފަޅު ތަރައްޤީކުރުމެވެ. 1280 ހެކްޓަރުގެ ބިމެއް ހިއްކައި 31،000 އަށް ވުރެ ގިނަ ހައުސިން ޔުނިޓް އަދި އެޅުމަށް ހަމަޖެހިފައިވާ ފުށިދިއްގަރުފަޅު ނިމޭއިރު ހުޅުމާލެ އަށް ވުރެ ބޮޑުވާނެއެވެ.
ޔޮޓް މެރީނާ، ކްރޫޒް ޓަރމިންލް އަދި ފަތުރުވެރިކަމާއި ވިޔަފާރިއަށް ޚާއްސަ ސަރަޙައްދުތައް ހިމެނޭ ފުށިދިއްގަރުފަޅު މަޝްރޫޢު ވަނީ މިއަންނަ އަހަރަށް ފާސްކުރާ ބަޖެޓުން އުނިކޮސްފައެވެ.
މަޖިލީހުގައި މެޖޯރިޓީ އޮންނަ އެމްޑީޕީގެ މެންބަރުންގެ ވަނީ މިޕްރޮޖެކްޓް މިވަގުތަށް މުހިންމު ނޫންކަމަށް ބުނެ މިޕްރޮޖެކްޓަށް އެކަށައަޅާފައި ހުރި ފައިސާ އެހެނިހެން ޕްރޮޖެކްޓްތަކަށް ބަހާލުމަށް ހުށަހަޅާފައެވެ.
