ރާއްޖެއިން މުޅިން ނައްތާލެވިފައިވާ ބައްޔެއްކަމަށްވާ ފައިލޭރިއާ އަށް ޕޮޒިޓިވް ވެފައިވާ ބަޔަކު ހދ. ކުޅުދުއްފުށިން ފެނިއްޖެއެވެ.
އެއިޑްސް ދުވަސް ފާހަގަކުރުމަށް ކުޅުދުއްފުށީ ރީޖަނަލް ހޮސްޕިޓަލުން ބޭއްވި ހެލްތް ކޭންޕްގައި ބައިވެރިވި ބިދޭސީންތަކެއް ފައިލޭރިއާއަށް ޕޮޒިޓިވް ވެފައިވާކަބް އެހޮސްޕިޓަލުން ނެރުނު ނޫސްބަޔާނަކުން ވަނީ ކަށަވަރު ކޮށްދީފައެވެ. ހެލްތް ޕްރޮޓެކްޝަން އެޖެންސީއާއި ސޮސައިޓީ ފޯ ހެލްތް އެޑިއުކޭޝަން އަދި ކުޅުދުއްފުށީ ސިޓީ ކައުންސިލާއި ގުޅިގެން ބޭއްވުނު މިހެލްތް ކޭންޕްގައި ބިދޭސީންނަށް އަމާޒުކޮށްގެން އެކި ބަލިތަކަށް ޓެސްޓް ހެދުނުކަމަށް އެހޮސްޕިޓަލުން ބުނެފައިވެއެވެ.
ފައިލޭރިއާ ޖެހިފައިތިބި މީހުންނަކީ ވަރަށް ފަހުގެ ތާރީޚެއްގައި ބޭރު ޤައުމުތަކުން ރައްޖެ އައި ފަރާތްތަކެއްކަމަށާއި ފައިލޭރިއާ ބަލި ފެނުނު މީހުންނާއިމެދު އެޗްޕީއޭގެ އިރުޝާދުގެ ދަށުން ޢަމަލު ކުރެވެމުންދާކަމަށް އެހޮސްޕިޓަލުން ނެރުނު ނޫސްބަޔާނުގައި ވަނީ ހާމަކޮށްފައެވެ.
ފައިލޭރިއާއަކީ މަދިރީގެ ޒަރިއްޔާއިން ފެތުރޭ ބައްޔެކެވެ. ހަޑިފެނުގައި އުފެދޭ ކިއުލެކްސް މަދިރީގެ ފުށުން ފެތުރޭ މިބަލި ރާއްޖެއިން އެންމެ ފަހުން ފެނިފައިވަނީ 2004 ވަނައަހަރު ލ. ފޮނަދޫއިންނެވެ. ފައިލޭރިއާއަށް ފަރުވާއެއްގެގޮތުގައި ދެވެނީ އެއްފަހަރުން ބޭނުންކުރާ ދެ ބޭހެކެވެ.
