ސޯޝަލް މީޑިއާގައި އިންޑިއާ އާއި ރާއްޖޭގެ ފަރާތްތަކުގެ ދެމެދުގައި ހިނގަމުންދާ ކަންކަމަށް ރިޢާޔަތްކޮށް، އަވައްޓެރި ޤައުމުތަކާއި ދެމެދު އޮންނަ ގުޅުންތައް ރަނގަޅު ކުރުމަށް މޯލްޑިވްސް އެސޯސިއޭޝަން އޮފް ޓްރެވެލް އެޖެންޓްސް އެންޑް ޓުއާ އޮޕަރޭޓަރސް (މަޓާޓޯ) އިން ގޮވާލައިފިއެވެ.
މަޓާޓޯއިން މިއަދު ނެރުނު ބަޔާނުގައި ބުނެފައިވަނީ އިންޑިއާއިން ލަކްޝަދީޕްގައި ފަތުރުވެރިކަން ފެށުމަކީ ރާއްޖޭގެ ފަތުރުވެރިކަމަށް އޭގެއިން އެއްވެސް ނޭދެވޭ އަސަރެއް ކުރާނެ ކަމެއް ނޫންކަމަށެވެ. އަދި ލަކްޝަދީޕުގައި ފަތުރުވެރިކަން ފެށުމަކީ ރާއްޖޭގެ ފަތުރުވެރިކަމަށް އޭގެއިން ފައިދާ ކުރާނެ ކަމެއް ކަމަށެވެ.
ރާއްޖޭގެ ސަރުކާރަށް ނިސްބަތްވާ ބައެއް އިސްފަރާތްތަކުން ސޯޝަލް މީޑިއާގައި ކޮށްފައިވާ ކޮމެންޓްތައް ކުއްވެރިކޮށް، ހުރިހާ ފަރާތްތަކުންވެސް އެއްބައިވަންތަކަމާއި އެއްބާރުލުމުގެ މެސެޖްތައް މީހުންނަށް ފޯރުކޮށްދިނުމަށް ގޮވާލާފައިވެއެވެ.
އިންޑިއާއަކީ އެއްގޮތަށް ވުރެ ގިނަ ގޮތުން ރާއްޖޭގެ ފަތުރުވެރިކަމުގެ ސިނާޢަތަށް ފައިދާކޮށްދޭ ޤައުމެއް ކަމަށާއި، ފަތުރުވެރިކަމުގެ ދާއިރާގައި އިސްކޮށް އުޅުއްވާ ބޭފުޅުންވެސް އިންޑިއާއާއި ރާއްޖެއާއި ދެމެދު އޮތް ގުޅުން ހީނަރު ނުވާނެފަދަ ގޮތަކަށް ޢަމަލުތަކާއި ބަސްމަގު ބެހެއްޓެވުމަށްވެސް މަޓާޓޯގެ ބަޔާނުގައި ގޮވާލާފައިވެއެވެ.
