މާލެސިޓީ މޭޔަރު އިންތިޚާބުގައި ޕީއެންސީގެ ފަރާތުން ވާދަކުރައްވާ ކެނޑިޑޭޓް އާޒިމާ ޝުކޫރުގެ ދަރަނީގެ މައްސަލައެއް ސިވިލްކޯޓުގައި ތާވަލުކޮށްފައިވާކަމަށް ބުނެ “ދައުރު” ނޫހުން ޝާއިޢުކުރި ޚަބަރާއި ގުޅިގެން، ސިވިލް ކޯޓުން “ދައުރު” ނޫހަށް ފިޔަވަޅު އަޅާފާނެކަމަށް އިޝާރާތްކޮށް ސިވިލްކޯޓުން ނޫސްބަޔާނެއް ނެރެފިއެވެ.
“ދައުރު” ނޫހުން ޝާއިޢު ކުރި އާޓިކަލް “އާޒިމާ ފްލެޓް ގަންނަން ކުންފުންޏަކުން ދިން 1.9 މިލިއަން ރުފިޔާ ނުދައްކައިގެން އިތުރު ދަޢުވާއެއް” ގައި “ޕްލެޓިނަމް ރިއަލް އެސްޓޭޓް ޕްރައިވެޓް ލިމިޓެޑް” އަށް އާޒިމާ ދައްކަންޖެހޭ ފައިސާ ނުދައްކައިގެން، އެކުންފުނިން އާޒިމާގެ މައްޗަށް ސިވިލް ކޯޓުގައި ދަޢުވާ ކޮށްފައިވާ ކަމަށާއި ސިވިލްކޯޓުގައި މައްސަލައިގެ އަޑުއެހުމެއް ތާވަލުކޮށްފައިވާކަމަށް ލިޔެފައިވެއެވެ.
ސިވިލްކޯޓުން ނެރުނު ބަޔާނުގައި ބުނެފައިވަނީ “ދައުރު” ނޫހުގައި ބުނެފައު އެވާ މައްސަލަ އެކޯޓުގައި ރެޖިސްޓަރ ކޮށްފައި ނުވާކަމަށެވެ. އަދި ދައުރު ނޫހުން އެބުނާ ކޯޓުގެ ލިޔެކިޔުންތަކަކީ ސައްޚަ ލިޔެކިޔުންތަކެއް ނޫން ކަމަށެވެ. އަދި މިފަދަ ލިޔެކިޔުންތައް ތައްޔާރުކޮށް ރިޕޯޓްކުރުމަކީ ކޯޓުގެ ޙުރުމަތް ކެނޑޭ ކަމެއްކަމުގައި ބަލައި، ލިޔެކިޔުން އުފެއްދި ފަރާތްތަކާއިމެދު ހަރުކަށި ފިޔަވަޅު އަޅާނެކަމަށްވެސް ބަޔާނުގައި ބުނެފައިވެއެވެ.
ދައުރު ނޫހުން އެއްވެސް ލިޔުމެއް އުފައްދާފައި ނުވާނެ ކަމަށާއި، އެނޫހުން ލިޔާ ލިޔުންތަކަކީ “ފެކްޓް ޗެކްޑް” އަދި “ވެރިފައިޑް” ލިޔުންތަކެއްކަމަށް އެނޫހުގެ ފަރާތުން ނިއުސްލެބަށް މަޢުލޫމާތު ދެއްވާފައިވެއެވެ.
