މާލެސިޓީ ކައުންސިލުގެ މޭޔަރުކަމަށް ވާދަކުރައްވާ ކެނޑިޑޭޓް، އާޒިމާ ޝުކޫރު ޕްލެޓިނަމް ރިއަލް އެސްޓޭޓް ޑިވެލޮޕްމެންޓް އަށް ދައްކަންޖެހޭ ދަރަނީގެ މައްސަލައެއް ސިވިލްކޯޓުގައި ތާވަލުކުރިކަމަށް ބުނެ ކޯޓުގެ ލިޔެކިޔުން “އުފެއްދީ” ޑރ.ހަސަން ސައީދުގެ ލޯފާމް “ޗެމްބަރސް އިން” ގައި މަސައްކަތްކުރާ ލޯޔަރެއްކަން ހާމަވެއްޖެއެވެ.
ނިއުސްލެބަށް މަޢުލޫމާތު ލިބިފައިވާ ގޮތުގައި ލިޔެކިޔުން “ފޯޖް” ކުރިކަމަށް ތުހުމަތު ކުރެވެނީ ޗެމްބަރސް އިން ގެ ލޯޔަރު އަހުމަދު ސަމީރު ގެ މައްޗަށެވެ. ލިޔެކިޔުންތައް އުފެއްދުމުގެ ފަހަތުގައި ވަނީ “ޗެމްބަރސް އިން” ގެ ލޯޔަރެއްކަމަށް ދައުރު އިންވެސް ވަނީ ނިއުސްލެބަށް މަޢުލޫމާތު ދީފައެވެ. އަދި “ޗެމްބަރސް އިން” ގެ ފަރާތުން މިބާވަތުގެ މައްސަލައެއް ފުލުހަށް ހުށަހަޅާފައި ވާކަމަށްވެއެވެ.
އާޒިމާގެ މައްސަލައެއް ސިވިލްކޯޓުގައި ތާވަލުކުރިކަމަށް “ދައުރު” ނޫހުން ރިޕޯޓް ކުރުމުން އާޒިމާ އަދި ސިވިލް ކޯޓުން ވެސް ވަނީ އެއީ ޙަޤީޤަތާއި ޚިލާފް ވާހަކައެއްކަމަށް ބުނެފައެވެ. އާޒިމާ ބުންފައިވަނީ “ދައުރު” ނޫސް ގޮވައިގެން ކޯޓަށް ދާނެ ކަމަށެވެ. އަދި ސިވިލްކޯޓުން ބުނެފައިވަނީ ލިޔުން އުފެއްދި ފަރާތަކާއި މެދު ފިޔަވަޅު އަޅާނެކަމަށެވެ.
“ދައުރު” އިން މިމައްސަލާގައި ބުނެފައިވަނީ އެ ނޫހަށް މިބުނާ ލިޔެކިޔުންތައް ލިބިފައިވަނީ “ޕްލެޓިނަމް ރިއަލް އެސްޓޭޓް ޑިވެލޮޕްމެންޓްގެ ލޯފާމް ‘ޗެމްބާޒް އިން’ އިންނެވެ. ދައުރު ނޫހުން މަޢުލޫމާތު ދިންގޮތުގައި ލޯފާމް އިން އެނޫހަށް ޙިއްސާކުރި ލިޔެކިޔުންތަކަކީ ސައްޚަ ލިޔެކިޔުންތަކެއް ނޫން ކަމަށް ޤަބޫލުކުރެވޭފަދަ އެއްވެސް ކަމެއް ހިނގާފައި ނުވުމުން އެލިޔުންތަކުގައިވާ މަޢުލޫމާތުތަކުގެ މައްޗަށް ބިނާކޮށް ޚަބަރު ޝާއިޢު ކުރި ކަމަށެވެ.
