މާލޭގެ މޭޔަރު ހޮވުމަށް އިއްޔެ ބާއްވާފައިވާ ބައި–އިލެކްޝަނުގައި ސަރުކާރު ހިންގާ ޕީއެންސީއަށް ނާކާމިޔާބީއާއި ކުރިމަތިލާން ޖެހިފައިވަނީ އިންތިހާބުކާމިޔާބުކުރުމަށްޓަކައި އެކަށީގެންވާ ވަރަށް މަސައްކަތް ނުކުރެވުމުގެ ސަބަބުން ކަމަށް އެ ޕާޓީގެ ޗެއާޕާސަން އަބްދުއްރަހީމް އަބްދުﷲ ވިދާޅުވެއްޖެ އެވެ.
ބޮޑު ތަފާތަކުން އިންތިހާބު ކާމިޔާބުކުރެއްވީ އެމްޑީޕީގެ ކެންޑިޑޭޓް އަދި ކުރީގެ އެމްޓީސީސީގެ ސީއީއޯ އާދަމް އާޒިމެވެ.
އޭނާއާ އެންމެ ގާތުން ޕީއެންސީގެ ކެންޑިޑޭޓު އާޒިމާ ޝުކޫރަށް ދެވަނައަށް އެންމެ ގިނަ ވޯޓު ލިބުނުއިރު އެކަމާ ގުޅިގެން އެ ޕާޓީން ބޭއްވި ނޫސްވެރިންގެބައްދަލުވުމުގައި އަބްދުއްރަހީމް ވިދާޅުވީ އެ ނަތީޖާއާ ކުރިމަތިލާން ޖެހުނީ ސަރުކާރާ ހަވާލުވެ، ސަރުކާރު އެކުލަވާލުމުގެ މަސައްކަތުގައި އުޅެން ޖެހުމުންކަމަށެވެ.
އަބްދުއްރަހީމް ވިދާޅުވީ މިދިޔަ ދުވަސްތަކުގައި އާންމު މެމްބަރުންނާ އެކު މަސައްކަތް ކުރަންޖެހޭ ގޮތަށް ވެސް މަސައްކަތް ކުރިއަށް ގެންދެވިފައި ނުވާކަމަށެވެ. އަދި އެކަމަށް މައާފަށް އެދިވަޑައިގަންނަވައި އޭނާ ވިދާޅުވީ މޭޔަރުގެ އިންތިހާބުން ނާކާމިޔާބީއާއި ކުރިމަތިވި އަނެއް ސަބަބަކީ ވެސް އާންމު މެމްބަރުންނާ އެކުބާއްވަންޖެހޭ ގުޅުން އެގޮތަށް ނުބޭއްވުން ކަމަށެވެ.
އޭނާ ވިދާޅުވީ އެ ނަތީޖާއާ ކުރިމަވީ ސަރުކާރުގެ ސިޔާސަތުތަކަށް ނުވަތަ ރައީސްއާ މެދު ނުރުހުމެއް އޮވެގެން ކަމަށް ގަބޫލުނުކުރައްވާ ކަމަށެވެ.
