މާލޭ ސިޓީ ކައުންސިލް މޭޔަރާއި ތިން މެންބަރުން ހޮވުމަށް އިއްޔެ ބޭއްވުނު ބައި–އިލެކްޝަންގައި ވޯޓުލީ މީހުންގެ އަދަދު މަދުވުމުން އިލެކްޝަންސްކޮމިޝަނުން ކަންބޮޑުވުން ފާޅުކޮށްފި އެވެ.
އިއްޔެގެ އިންތިހާބު ބާއްވާފައި ވަނީ މާލޭ ސިޓީ ކައުންސިލްގެ މާފަންނު ދެކުނާއި، މެދު ހެންވޭރު އަދި ސިޓީ ކައުންސިލުން އަންހެނުންނަށްހާއްސަކޮށްފައިވާ ހެންވޭރު ދެކުނު ދާއިރާގެ މެމްބަރުން ސަރުކާރުގެ އެހެން މަގާމުތަކަށް އައްޔަން ކުރެއްވުމާ ގުޅިގެން އެ ގޮނޑިތައް ހުސްވުމުންނެވެ.
ވޯޓުލުމުގެ ހައްގު 54،680 މީހަކަށް ލިބޭ ނަމަވެސް ވޯޓުލުމުގެ ވަގުތު ހަމަވިއިރު ވޯޓުލާފައި ވަނީ އެންމެ 17،000 އެއްހާ މީހުން ކަމަށް އިލެކްޝަންސްކޮމިޝަނުން ވަނީ ބުނެފަ އެވެ.
އީސީގެ ނައިބު ރައީސް އިސްމާއީލް ހަބީބް މިއަދު ވިދާޅުވީ، އިންތިހާބުގައި ވޯޓު ލާފައިވަނީ ވޯޓުލެވޭ އާބާދީގެ 32 ޕަސެންޓް މީހުން ކަމަށާއި މިއީ އަންދާޒާކުރި އަދަދަށް ވުރެ މާ ދަށް އަދަދެއް ކަމަށެވެ.
އާންމުކޮށް ލޯކަލް ކައުންސިލްގެ ބައި–އިލެކްޝަންތަކުގައި ވޯޓު ލާ މީހުންގެ އަދަދު މަދު ނަމަވެސް މޭޔަރަކު ހޮވުމަށް ބޭއްވި އިންތިހާބެއް ކަމުން ވޯޓު ލާންގިނަ ބަޔަކު ނުކުންނާނެ ކަމަށް ލަފާކުރި ކަމަށް ހަބީބް ވިދާޅުވިއެވެ.
މީގެ އިތުރުން ހަބީބް ވިދާޅުވީ ލޯކަލް ކައުންސިލްތަކުގެ ބައި–އިލެކްޝަންތަކުގައި ވޯޓު ލާ މީހުންގެ އަދަދު މަދުވުމުގެ ކަންބޮޑުވުން އަބަދުވެސްއޮންނަކަމަަށެވެ. އަދި ވޯޓު ލާން ނުކުންނަ މީހުންގެ އަދަދު މަދުވާ ސަބަބު ބަލަން ޖެހިފައިވާ ކަމަށެވެ.
