ވެރިކަންކުރާ ޕާޓީ ޕީއެންސީއާއި އިދިކޮޅު އެމްޑީޕީގެ މަޖިލިސް ޕްރައިމަރީ ބާއްވާ ތާރީޚް ފަސްކޮށްފިއެވެ.
ރާއްޖޭގެ އެންމެ ބޮޑު ދެ ޕާޓީކަމަށްވާ އެމްޑީޕީއާއި ޕީއެންސީގެ ޓިކެޓްގައި މަޖިލީހަށް ވާދަކުރައްވާ ކެނޑިޑޭޓުން ހޮވުމަށް ބާއްވާ ޕާޓީގެ އެތެރޭގެ އިންތިޚާބު ފަސްކޮށްފައިވާކަން އެދެޕާޓީގެ ޕްރައިމަރީގައި ވާދަކުރައްވާ ކެނޑިޑޭޓުންނަށް ވަނީ އަންގާފައެވެ.
ޕީއެންސީގެ ޕްރައިމަރީ ބޭއްވުމަށް ކުރިން ނިންމާފައިވާ ޖެނުއަރީ20 މިހާރު ވަނީ ޖެނުއަރީ27 އަށް ބަދަލުކޮށްފައެވެ. ޕީއެންސީގެ ޕްރައިމަރީގައި ވާދަކުރައްވާ ކެނޑިޑޭޓުން ތިއްބަވާ ގްރޫޕަށް އެޕާޓީގެ ލީޑާޝިޕުން ފޮނުވާފައިވާ މެސެޖެއްގައި ވަނީ ޕީއެންސީގެ ޓިކެޓް ދޭނެ ކެނޑިޑޭޓުން ހޯދުމަށް ބާއްވާ މަޖިލިސް ޕްރައިމަރީ ޖެނުއަރީ27 އަށް ފަސްކޮށްފައިވާ ކަމަށެވެ.
ޕީއެންސީގެ ޕްރައިމަރީ ބޭއްވުމަށް ފުރަތަމަ ނިންމާފައިވާ ތާރީޚަކީ ޖެނުއަރީ20 އެވެ. ނަމަވެސް ފަހުން ޖެނުއަރީ23 އަށް ތާރީޚް ބަދަލުކުރުމަށްފަހު އަނެއްކާވެސް ޖެނުއަރީ20 ބަދަލުކުރީ މިދިޔަ ޑިސެމްބަރ15 ގައެވެ.
އިދިކޮޅު އެމްޑީޕީއިން މަޖިލިސް ޕްރައިމަރީ ބާއްވަން ފުރަތަމަ ނިންމާފައިވަނީ މިމަހުގެ26 އަދި27 ދެދުވަހުއެވެ. ނަމަވެސް އެމްޑީޕީން މިއަދު ނެރުނު ބަޔާނެއްގައި ބުނެފައިވަނީ އެޕާޓީގެ ޕްރައިމަރީ އަންނަ މަހުގެ3 އަށް ފަސްކޮށްފައިވާކަމަށެވެ.
