ކުރީގެ ނައިބު ރައީސް ފައިސަލް ނަސީމް ޖުމްހޫރީ ޕާޓީން ވަކިވެވަޑައިގެންފި އެވެ.
މައުލޫމާތު ލިބިފައިވާ ގޮތުގައި ފައިސަލް ޖޭޕީން ވަކިވެވަޑައިގަތީ އެ ޕާޓީގެ ލީޑަރު ގާސިމް އިބްރާހީމްއާ ވާހަކަ ދެއްކެވުމަށް ފަހުގައިއެވެ. ޖެޕީއިން ވަކިވީ ސަބަބެއް ހާމަ ނުކުރެއްވި ނަމަވެސް ފައިސަލް ވަނީ އެ ޕާޓީން އެމަނިކުފާނަށް ލިބިވަޑައިގެންނެވި ފުރުސަތުތައް ފާހަގަ ކުރައްވައި ގާސިމަށް ޝުކުރު އަދާކުރެއްވި އެވެ.
އާ ގާނޫނު އަސާސީގެ ދަށުން ވެރިކަމުގެ ދައުރެއް ފުރިހަމަ ކުރެއްވި ފުރަތަމަ އަދި ހަމައެކަނި ނައިބު ރައީސް އަކީ ފައިސަލް އެވެ.
ޖުމްހޫރީ ޕާޓީއާއި ގުޅިވަޑައިގަތުމުގެ ކުރިން ފައިސަލް ހުންނެވީ އެމްޑީޕީގައިއެވެ. ފައިސަލް ސިޔާސީ ހަޔާތް ފެއްޓެވީވެސް ހަމަ އެމްޑީޕީއިންނެވެ. ނަމަވެސް އޭގެ އަހަރު ތަކެއްފަހުން ޖޭޕީއާއި ގުޅިވަޑައިގެންފައިވެއެވެ.
އަށާރަ ވަނަ ރައްޔިތުންގެ މަޖިލީހުގެ ކާށިދޫ ދާއިރާގެ މެމްބަރަކަށް ފައިސަލް ހޮވިވަޑައިގަތީ ޖޭޕީގެ މެމްބަރެއްގެ ގޮތުގަ އެވެ. އަދި 2018 ވަނަ އަހަރުގެ ރިޔާސީ އިންތިހާބުގައި ގުޅިފައިވާ ޕާޓީތަކުގެ ރިޔާސީ ކެންޑިޑޭޓަކަށް ކުރީގެ ރައީސް އިބްރާހިމް މުހައްމަދު ސޯލިހު ނެރުއްވިއިރު، އެ މަނިކުފާނުގެ ރަނިންމޭޓަކަށް ވުމަށް ޖޭޕީގެ ކައުންސިލްގައި ނެގި ވޯޓު ކާމިޔާބު ކުރެއްވީ ފައިސަލް އެވެ.
