އައްޑޫ ސިޓީގެ ފެނާއި ކުނި މެނޭޖްކުރުމަށް ދިމާވެފައިވާ މައްސަލަތައް ހައްލުކުރުމަށް ސަރުކާރުން މަސައްކަތްކުރާނެ ކަމަށް މޫސުމީ ބަދަލުތަކާއި ތިމާވެއްޓާއި ހަކަތައާއި ބެހޭ ވަޒީރު ތޯރިގް އިބްރާހިމް ވިދާޅުވެއްޖެއެވެ.
ވަޒީރު ތޯރިގް އާއި ވުޒާރާގެ ޓީމެއް މިހާރު އައްޑޫ ސިޓީގައި ހަރަކާތްތެރިވަމުންދާއިރު، އެ ވުޒާރާއިން މައުލޫމާތު ދެއްވާގޮތުގައި މި ދަތުރުފުޅުގެ މައިގަނޑު މަގްސަދަކީ އައްޑޫގެ ކުނި މެނޭޖްކުރުމުގެ އިތުރުން ފެނާއި ކަރަންޓުގެ ހިދުމަތް ފޯރުކޮށްދިނުމަށް ހުރި ގޮންޖެހުންތައް ދިރާސާކޮށް، އެކަމަށް ހައްލު ހޯދުމެވެ.
މިކަމާއި މަޝްވަރާ ކުރުމުގެ ގޮތުން ވަޒީރު ތޯރިގްވަނީ އައްޑޫ ސިޓީގެ މޭޔަރުގެ އިތުރުން، އައްޑޫ ސިޓީގެ ކައުންސިލާއި އެސިޓީގެ އަންހެނުންގެ ތަރައްޤީއަށް މަސައްކަތްކުރާ ކައުންސިލްގެ މެންބަރުންނާއި ބައްދަލުކުރައްވާފައިއެވެ. އަދި މީގެ އިތުރުން އައްޑޫގައި ޤާއިމްކޮށްފައިވާ ވެމްކޯ އާއި ފެނަކައިގެ ސައިޓްތައް ވެސް ބައްލަވާލައްވާފައިވެއެވެ.
ވަޒީރު ވިދާޅުވީ މެދުކެނޑުމެއްނެތި، ފެނާއި ކަރަންޓުގެ ހިދުމަތް އައްޑޫ ރައްޔިތުންނަށް ފޯރުކޮށްދިނުމަކީ މުހިއްމުކަމެއްކަމަށެވެ. އަދި އެކަމަށް ބޭނުންވާ ވަސީލަތްތައް ހޯދުމުގެ މަސައްކަތް ވުޒާރާއިން ކުރާނޭ ކަމުގެ ޔަގީންކަން ވަޒީރު ވަނީ އަރުވާފައެވެ
މިބައްދަލުވުމުގައި ރައްކާތެރިކަމާއެކު ކުނި ނައްތާލުމުގެ މައްސަލަ ފާހަގަކޮށް ކުނި މެނޭޖުކުރުމުގެ މަސައްކަތް މިހާރަށްވުރެ ރަނގަޅަށް އެކަންތައް ކޮށްދިނުމަށް ކައުންސިލުން ވަނީ އެދިފައެވެ،
މިކަމާއި ގުޅިގެން ތޯރިގް ވިދާޅުވީ، މި މައްސަލަތަކަށް ސަރުކާރުން ހައްލު ހޯދާ ދެއްވާނެ ކަމަށެވެ.
