އަމީނީމަގުގައި ހުރި މައްސަލަތައް ބަލާ ރަނގަޅު ކުރަމުންދާ ކަމަށް އިމާރާތްކުރުމާއި ބިނާރާ ބެހޭ ވަޒީރު އަބްދުﷲ މުއްތަލިބު ވިދާޅުވެއްޖެއެވެ.
އަމީނީ މަގުގައި ކުރިން ތާރު އަޅާފައިވާ ސަރަހައްދުގައި ތާރުގަނޑު ނައްޓައިގެން ގޮސްފައިވާ މަންޒަރު ފެންނަ ވީޑިއޯއެއް އާންމު ބުމާއި ގުޅިގެން ވަޒީރު “އެކްސް” ގައި ކުރެއްވި ޕޯސްޓެއްގައި ވިދާޅުވީ އަމީނީ މަގު އިއްޒުންދީން މަގާ ހަމައަށް ކޮށްފައިވާ މަސައްކަތަކީ 17 ނޮވެންބަރުގެ ކުރިން ކޮށް ނިންމާފައިވާ މަސައްކަތެއް ކަމަށެވެ. އަދި މިހާރު ދަނީ އަމީނީ މަގުގެ އެއްކޮޅުން އަނެއްކޮޅަށް ހުރި މައްސަލަތައް ބަލައި ރަނގަޅުކުރުމުގެ މަސައްކަތް ކުރަމުން ކަމަށެވެ.
މި ސަރުކާރުން ވެރިކަމާ ހަވާލުވެ އަމީނީމަގުގެ ބާކީ ދެ ސެގްމަންޓުގެ މަސައްކަތް ފެށީ މިދިޔަ ޑިސެމްބަރު މަހުގެ 9 ވަނަ ދުވަހުއެވެ. އަދި މިހާރު ވަނީ މަސައްކަތް ނިންމާ މަގު އާންމުނަށް ހުޅުވާލާފައިއެވެ.
މި މަޝްރޫއުގެ ތެރެއިން ކުރެވޭނެ މަސައްކަތް:
- 1.79 ކިލޯމީޓަރު (މުޅި މަގު)ގައި ތާރު އެޅުން
- މަގުގެ ދުވާރު ހެދިގެން ހެދުން
- ލޯފަން ބޭފުޅުންނަށް ހާއްސަ ބްރައިލް ބްލޮކް ބެހެއްޓުން
- ނުކުޅެދުންތެރިކަން ހުންނަ ފަރާތްތަކަށް (ފުރޮޅުލީގޮނޑި)ބޭނުން ކުރާ ފަރާތްތަކަށް ހާއްސަކޮށް ފަސޭހައިން އުޅެވޭނެ ގޮތް ހެދުން.
- ބަސްހުއްޓި، ޕާކިންގ ޒޯން، ބަމްޕަރުތަކާއި މަގުބައްތި އަދި މަގުމަތީގައި ނިޝާންތައް ބެހެއްޓުން.
- ފެންބޮޑުވުމުގެ މައްސަލައަށް ހައްލު ގެނައުމަށް ޕަމްޕް ބެހެއްޓުން.
