މިނިސްޓަރ އޮފް އިސްލާމިކް އެފެއާޒް ކަމުގެ މަގާމަށް ޑރ. މުޙައްމަދު ޝަހީމް ޢަލީ ސަޢީދު އަދި މިނިސްޓަރ އޮފް ހައުސިންގ، ލޭންޑް އެންޑް އަރބަން ޑިވެލޮޕްމަންޓް ކަމުގެ މަގާމަށް ޑރ. ޢަލީ ޙައިދަރު އަޙްމަދު، ރައީސުލްޖުމްހޫރިއްޔާ ޑރ. މުޙައްމަދު މުޢިއްޒު އައްޔަން ކުރައްވައިފިއެވެ.
މިއަދު ރައީސް އޮފީހުގައި ބޭއްވުނު ރަސްމިއްޔާތެއްގައި މިދެބޭފުޅުންނަށް ވަޒީރުކަމުގެ ހުވާލައިދެއްވީ ދިވެހިރާއްޖޭގެ ސުޕްރީމް ކޯޓުގެ ފަނޑިޔާރު އޮނަރަބްލް އަލްއުސްތާޛު ޙުސްނުއް ސުޢޫދުއެވެ.
އަދި ދެބޭފުޅުންވެސް ވަޒީރުންގެ މަޖިލީހުގެ މެންބަރުންގެ ހުވައިގެ އިޤްރާރުގައި ސޮއިކުރެއްވިއެވެ.
ޑޜ. ޝަހީމްއާއި ޑރ. ހައިދަރު އަކީ ކުރިންވެސް މިމަޤާމުގައި ތިއްބެވި ދެ ވަޒީރުންނެވެ. މިއަދު ބޭއްވުނު ރައްޔިތުންގެ މަޖިލީހިގެ ޖަލްސާގައިވަނީ މި ދެމިނިސްޓަރުންގެ އިތުބާރުނެތްކަމަށް ފާސްކޮށްފައެވެ.
އަލަށް އައްޔަންކުރެވުނު މިނިސްޓަރުންނަށް ރުހުން އޮތްތޯބެލުމަށް 7 ދުވަސްތެރޭ މަޖިލީހަށް ފޮނުވަން ވާނެއެވެ.
