ވަޒީރުންނަށް ރުހުން ނުދިނުމަށް އެމްޑީޕީގެ ޕާލަމެންޓްރީ ގްރޫޕުން ނެރެފައިވާ ވިޕްލައިނާއި ހިލާފުވި މެމްބަރުންގެ މައްސަލަ ބަލައިފިޔަވަޅު އަޅާނެކަމަށް އެމްޑީޕީން ބުނެފިއެވެ.
އެމްޑީޕީން މިއަދު ބޭއްވި ނޫސްވެރިންގެ ބައްދަލުވުމުގައި އެޕާޓީގެ ޕީޖީ ލީޑަރު، އަދި އަލިފުށި ދާއިރާގެ މެމްބަރު މުހައްމަދު ރަޝީދު ހުސައިން (ބިގޭ) ވިދާޅުވީ ގައުމީ މަޖިލީހުގެ އަގުލަބިއްޔަތުން ނިންމައި، ނެރެފައިވާ ވިޕްލައިނާ ޚިލާފަށް ޢަމަލުކުރި މެންބަރުންގެ މައްސަލަ ބަލަމުންދާކަމަށެވެ.
ވިޕްލައިނާއި ހިލާފުވެފައިވާ އެމްޑީޕީގެ މެމްބަރުންނަކީ އިހަވަންދޫ ދާއިރާގެ މެމްބަރު މުހައްމަދު ޝިފާއު އާއި ފުވައްމުލަކު ދެކުނު ދާއިރާގެ މެމްބަރު މުހައްމަދު މުމްތާޒާއި ކުޅުދުއްފުށި ދެކުނު ދާއިރާގެ މެމްބަރު ޖަމްޝީދު މުހައްމަދާއި ބިލެއްދޫ ދާއިރާގެ މެމްބަރު އަހުމަދު ހަލީމް އާއި ކުޅުދުއްފުށީ އުތުރު ދާއިރާގެ މެމްބަރު ޔާސިރު އަބްދުލްލަތީފު އާއި ހެންވޭރު ދެކުނު ދާއިރާގެ މެމްބަރު، ހުސެއިން ޝަހީމްގެ އިތުރުން މަކުނުދޫ ދާއިރާގެ މެމްބަރު، މުހައްމަދު ރާއީއެވެ.
އެމްޑީޕީން ވިޕްލައިނެއް ނެރުނީ އިކޮނޮމިކް މިނިސްޓަރ، މުހައްމަދު ސައީދުގެ އިތުރުން، އިސްލާމިކް މިނިސްޓަރު ޑރ. މުހައްމަދު ޝަހީމް އަލީ ސައީދާއި ހައުސިން މިނިސްޓަރު ޑރ. އަލީ ހައިދަރު އަދި ބަންޑާރަ ނައިބު އަހުމަދު އުޝާމަށް ރުހުން ނުދޭށެވެ.
އެމްޑީޕީން ނެރެފައިވާ ވިޕް ލައިނާ ހިލާފަށް ވޯޓު ލެއްވުމުގެ ސަބަބުން އިކޮނޮމިކް މިނިސްޓަރު މުހައްމަދު ސައީދަށް މަޖިލީހުގެ ރުހުން ވަނީ ލިބިފައެވެ.
