ރައްޔިތުންގެ މަޖިލީހުގައި މައްޗަންގޮޅި މެދު ދާއިރާ ތަމްސީލްކުރައްވާ، ރައްޔިތުންގެ މަޖިލީހުގެ ކުރީގެ ރައީސް މުހައްމަދު ނަޝީދު ރާއްޖެއިން ބޭރަށް ދިރިއުޅުން ބަދަލުކުރެއްވީ މަޖިލީހުގައި އަދާކުރައްވާ ޒިންމާއާ ގުޅޭ ގޮތުން މަޖިލީހަށް ވަކި އެއްޗެއް ނާންގަވާ ކަމަށް މަޖިލީހުގެ އިދާރާ އިން ބުނެފި އެވެ.
މަޖިލީހުގެ ރައީސްގެ މަގާމުގައި ހުންނެވުމަށްފަހު އެ މަގާމުން އެމަނިކުފާނު ވަނީ އިސްތިއުފާ ދެއްވާފައެވެ. އިސްތިއުފާ ދެއްވާފައިވަނީ އެމްޑީޕީން ނަޝީދުގެ އިތުބާރު ނެތް ކަމުގެ މައްސަލައެއް މަޖިލީހަށް ހުށަހެޅުމުންނެވެ.
އޭގެ ފަހުން، ސިޔާސީ ކަންކަމާއި ދުރަށް ވަޑައިގެންނެވިކަން އިއުލާން ކުރެއްވުމަށްފަހު ފަހު އެމަނިކުފާނު ވަނީ ވަނީ ދިރިއުޅުން ގާނާއަށް ބަދަލުކުރައްވައިފަ އެވެ.
އެމަނިކުފާނު ގާނާ އަށް ވަޑައިގަތީ ކްލައިމެޓް ވަލްނަރަބަލް ފޯރަމް (ސީވީއެފް) ގެ ސެކްރެޓަރީ ޖެނެރަލްގެ މަގާމާ ހަވާލުވެވަޑައިގަތުމަށެވެ.
މަޖިލިސް ޗުއްޓީގައިވާ މި ދަނޑިވަޅުގައި ގާނާއަށް ދިރިއުޅުން ބައްދަލު ކުރެއްވި ނަމަވެސް، އެކަމާއި ގުޅިގެން އެއްވެސް މަޢުލޫމާތެއް މަޖިލީހަށް ދެއްވާފައި ނުވާ ކަމަށް މަޖިލީހުގެ ކޮމިއުނިކޭޝަން ޑިރެކްޓަރު ހަސަން ޒިޔާއު “ވޮއިސް” އަށް ވަނީ މައުލޫމާތު ދެއްވާފައެވެ.
މަޖިލީހުގެ ފަހު ދައުރު ފެބްރުއަރީގައި ފެށޭއިރު، ދައުރުގެ ބާކީ އޮތް ތިން މަސް ދުވަސްތަކަށް ޗުއްޓީ ނުވަތަ ސަލާމްވެސް އެމާނިކުފާނު އަދި ނަންގަވާފައި ނުވާ ކަމަށް ޒިޔާޢު ވިދާޅުވި އެވެ.
