ގެދޮރުވެރިޔާ ސްކީމްގެ ދަށުން ދޫކުރާ ފުރަތަމަ 4،000 ފްލެޓް ލިބުނު މީހުންގެ ތެރެއިން 60 ޕަސެންޓް މީހުން ޝަރުތު ހަމަނުވާ ކަމަށް އެންޓި ކޮރަޕްޝަން ކޮމިޝަން (އޭސީސީ) އިން މިއަދު ބުނެފި އެވެ.

މިހާރު ކުރިއައްދާ ޕްރެސް ކޮންފަރެންސްގައި އޭސީސީއިން ވަނީ ކުރީގެ ރައީސް އިބްރާހިމް މުހައްމަދު ސޯލިހުގެ ސަރުކާރުން އިއުލާންކުރި ގެދޮރުވެރިޔާ ސްކީމްގެ ދަށުން ދޫކުރާ ފުރަތަމަ 4،000 ފްލެޓް ލިބޭ މީހުންގެ ލިސްޓާ ގުޅޭ ގޮތުން ކުރި ތަހުގީގް ހާމަކޮށްފައިއެވެ.

އޭސީސީން ހުށަހެޅި ޕްރެޒެންޓޭޝަންގައި ބުނީ އެ ކޮމިޝަނުން ކުރި ތަހުގީގުގައި ޖުމްލަ 4،048 ފޯމެއް ބެލި ކަމަށެވެ.

އެ ކޮމިޝަންގެ ފަރާތުން މައުލޫމާތު ދޭގޮތުގައި ތަހުގީގު ބެލި ފޯމުތަކުގެ ތެރެއިން 59.6 ޕަސެންޓް ފޯމުގެ ޝަރުތު ހަމަނުވެ އެވެ. އެއީ ގާތްގަނޑަކަށް 2،400 ފްލެޓެވެ.

ޝަރުތު ހަމަވެ، އެއްވެސް މައްސަލައެއް ނޫޅެނީ 20.7 ޕަސެންޓް ފޯމު ކަމަށް އެފަރާތުން ބުނެފައިވެއެވެ. ޝަރުތު ހަމަވި ނަމަވެސް، މައްސަލަ ހުރީ 19.7 ޕަސެންޓް ފޯމުގައި ކަމަށް ވެސް އެ ކޮމިޝަނުން ބުންޏެވެ. އެއީ ގާތްގަނޑަށް 1،600 ފްލެޓެވެ.

ފޯމުތަކުގައި ހުރި މައްސަލަތައް

• 4،000 ފްލެޓް ލިބޭ މީހުންގެ ލިސްޓުގައި ޝަރުތު ހަމުވާ ގިނަ ބަޔަކު ހިމަނާފައިވޭ.
• ފޯމުތަކުގައި ދީފައިވާ މައުލޫމާތު ފުށުއެރުން.
• ހާއްސަ އެހީއަށް ބޭނުންވާ ފަރާތްތަކުގެ ބަޔަށް އުސޫލާ ހިލާފަށް ޕޮއިންޓް ދީފައިވުން.
• ޝަކުވާގެ މުއްދަތުގައި އާ ލިޔެކިޔުން ހުށަހެޅި.
• ޕޮއިންޓްދިނުމުގައި އުސޫލާ ހިލާފަށް އިތުރަށް ޕޮއިންޓް ދީފައިވޭ.
• ގިނަ ފަރާތްތަކެއް ހައްގު ގެއްލުމުގެ އިހުމާލު އޮތްކަން ފާހަގަކުރެވުނު.

އޭސީސީގެ ރައީސް އާދަމް ޝާމިލް ވިދާޅުވީ ފްލެޓް ލިބިފައިވާ މީހުންނާއި އެގްރިމެންޓް ހަދައި ލިޔުން ދީފައިވާ މީހުންނާ ދޭތެރޭ ދެން ހަދާނެ ގޮތެއް އެނގޭނީ ހައުސިން މިނިސްޓްރީ އަށް ކަމަށާއި އެއީ އޭސީސީގެ މެންޑޭޓްގެ ތެރޭގައި އޮތް ކަމެއް ނޫން ކަމަށެވެ.

އޭސީސީގެ ތަހުގީގު ލަސްވެ، ފްލެޓްތަކާ ގުޅޭ ގޮތުން ހައުސިން މިނިސްޓްރީ އަށް ގޮތެއް ނުނިމި ވަނިކޮށް އެ ކޮމިޝަނުން މިދިޔަ ބުރާސްފަތި ދުވަހު ވަނީ ފްލެޓްތައް ދޫކުރުން ކުރިއަށް ގެންދަން އަލުން ހުއްދަ ދީފަ އެވެ.