ރައްޔިތުންގެ މަޖިލީހުން ރުހުން ނުދިން ތިން ވަޒީރުންނަށް ރުހުން ހޯދުމަށްޓަކައި މަޖިލީހަށް އަނެއްކާވެސް ހުށަހަޅައިފިއެވެ.
އިދިކޮޅު އެމްޑީޕީގެ އަޣުލަބިއްޔަތު އޮތް މަޖިލީހުން ރުހުން ދީފައި ނުވާ ތިން ވަޒީރުންނަކީ ބަންޑާރަނައިބު އަހުމަދު އުޝާމާއި އިސްލާމިކް މިނިސްޓަރު ޑރ. މުހައްމަދު ޝަހީމް އަލީ ސައީދާއި ހައުސިން މިނިސްޓަރު ޑރ. އަލީ ހައިދަރެވެ.
މި ވަޒީރުންނަށް ރުހުން ދިނުމަށް އެދި ސަރުކާރުން އަލުން ފޮނުވާފައިވާ ކަން މަޖިލީހުގެ ކޮމިއުނިކޭޝަންސް ޑިރެކްޓަރު ހަސަން ޒިޔާއު ވަނީ ކަށަވަރުކޮށްދެއްވައިފައެވެ.
ނަމަވެސް ރުހުން ނުދިނުމާއެކު ހަމަ އެ ދުވަހު ރައީސް ޑރ. މުޙައްމަދު މުއިއްޒު ވަނީ އަލުން އެ ތިން ބޭފުޅުން އެ މަގާމުތަކަށް އައްޔަން ކުރައްވައިފައެވެ.
ވަޒީރުންނަށް ރުހުން ދިނުމަށް މަޖިލީހުގައި އެ ދުވަހު ނެގި ވޯޓުގައި ޝަހީމަށް ރުހުން ނުދޭން 31 މެންބަރުން ވޯޓު ދިންއިރު އޭނާއަށް ރުހުންދޭން ވޯޓު ދެއްވީ 30 މެންބަރުންނެވެ. އުޝާމް ބަންޑާރަނައިބު ކަމަށް އައްޔަންކުރަން ރުހުންދޭން ވޯޓު ދީފައިވަނީ 24 މެންބަރުންނެވެ. ނުފެންނަކަމަށް ވޯޓު ދީފައިވަނީ 44 މެމްބަރުންނެވެ. ހައިދަރަށް ރުހުން ދޭން 26 މެމްބަރުން ވޯޓު ދީފައިވާއިރު ރުހުން ނުދޭން 46 މެމްބަރުން ވަނީ ވޯޓު ދީފައެވެ.
އެ ތިން ވަޒީރުން ފިޔަވައި ސަރުކާރުގައި ތިއްބެވި 19 ވަޒީރުންނަށް މަޖިލީހުން ވަނީ ރުހުންދީފައެވެ.
