އެންޓި ކޮރަޕްޝަން ކޮމިޝަން (އޭސީސީ) އަކީ މިހާރު ކޮރަޕްޝަންގެ ކޮމިޝަނެއް ކަމަށާއި އެތަނުގެ ބޭނުމެއް ނެތް ކަމަށް މާފަންނު މެދު ދާއިރާގެ މެމްބަރު، އިބްރާހިމް ރަޝީދު (ބޮންޑޭ) ވިދާޅުވެއްޖެއެވެ.
މިއަދުގެ މަޖިލީހަށް ގަލޮލޫ އުތުރު ދާއިރާގެ މެމްބަރު، އީވާ އަބްދުﷲ ހުށަހެޅި “ސަރުކާރުގެ ބޯހިޔާވަހިކަމުގެ ދަށުން މާލޭ ސަރަހައްދުން ފްލެޓް ލިބޭ ފަރާތްތަކަށް ވީހާވެސް އަވަހަށް ފްލެޓް ދޫކުރުމަށް” ގޮވާލައި ހުށަހެޅި މައްސަލައަށް ބަހުސް ކުރައްވަމުން ބޮންޑޭ ވިދާޅުވީ، ނަފްސާނީ މައްސަލަތަކާއި މަސްތުވާތަކެތީގެ މައްސަލަތަކުގެ އަސްލަކީ ދިރިއުޅެވޭނެ ތަނެއް ނެތުން ކަމަށާއި އެހެންކަމުން އެކަމަށް ހައްލެއް ހޯދަން ޖެހޭ ކަމަށެވެ.
ބޮންޑޭ ވަނީ ފްލެޓް މައްސަލައިގައި ރައީސް އޮފީސް ކައިރިއަށް މުޒާހަރާ ކުރުމަށް ދިއުމަށް ވެސް ގޮވާލާފައެވެ. އަދި ފްލެޓްތައް ރައްޔިތުންނަށް ނުދީފިނަމަ، ކުރީ ސަރުކާރަށް ހެދި ގޮތަށް މި ސަރުކާރު ވެސް ވެރިކަމުން ވައްޓާލާނެ ކަމަށް ބޮންޑޭ ވަނީ ވިދާޅުވެފައެވެ.
ކުރީގެ ސަރުކާރުން މާލޭ ރައްޔިތުންނަށް ދޫކުރި 4000 ފްލެޓްތަކުގައި ހިމެނޭ މީހުންގެ ތެރެއިން ގިނައީ ޝަރުތު ހަމަނުވާ މީހުން ކަމަށް ބުނެ އޭސީސީއަށް ހުށަހެޅި މައްސަލައިގައި އޭސީސީން އެންމެ ފަހުން ބުނެފައިވަނީ 4000 ފްލެޓް ދީފައިވާ މީހުންގެ ތެރެއިން 60 އިންސައްތަ މީހުންނަކީ ޝަރުތު ހަމަ ނުވާ މީހުން ކަމަށެވެ.
