ކުރީގެ ސަރުކާރުން ހިންގި ‘ގެދޮރުވެރިޔާ’ ސްކީމަށް ޝަރުތު ހަމަވާ ކަމަށް ދައްކަން ކައުންސިލްތަކުން ދޮގު ލިޔެކިޔުންތަކެއް ދިން މައްސަލަ ބަލާނެ ކަމަށް އެންޓި ކޮރަޕްޝަން ކޮމިޝަން (އޭސީސީ)އިން ބުނެފި އެވެ.
ގެދޮރުވެރިޔާ ސްކީމުގެ އުސޫލުގައި ފްލެޓަށް އެދި ހުށަހެޅުމުގައި ޝަރުތުތަކުގެ ތެރެއިން އެއް ޝަރުތަކީ މާލޭގައި ދިރިއުޅޭތާ 15 އަހަރު ވެފައިވާ މީހަކަށް ވުމެވެ.
ރައްޔިތުންގެ މަޖިލީހުގެ މިނިވަން މުއައްސަސާތަކާ ބެހޭ ކޮމެޓީއަށް އޭސީސީގެ މެމްބަރުން ހާޒިރުކޮށްފައި ވާއިރު އެ ބައްދަލުވުމުގައި އޭސީސީގެ ނައިބު ރައީސް އަބްދުއް ސަލާމް ވިދާޅުވީ ކައުންސިލްތަކުން ދޮގު މައުލޫމާތު ދިނުމަކީ ކުށެއް ކަމަށެވެ.
ގެދޮރުވެރިޔާ’ ސްކީމުން ފްލެޓަށް އެދި 20،696 މީހުން ކުރިމަތިލާފައިވާއިރު އޭގެ ތެރެއިން 18،167 މީހުން ފްލެޓަށް ޝަރުތުހަމަވާ ކަމަށް ދާއިމީ ލިސްޓެއް ކުރީގެ ސަރުކާރުގެ ހައުސިން މިނިސްޓްރީން އާންމުކުރި އެވެ.
ދާއިމީ ލިސްޓާ ގުޅޭގޮތުން އާންމުންގެ ފަރާތުން ހުށަހެޅި ޝަކުވާތަކަށް ބިނާކޮށް އޭސީސީއިން ކުރިއަށްގެންދާ ތަހުގީގުގައި އޭގެ ތެރެއިން 4،048 ފޯމެއް ވަނީ ބަލާފަ އެވެ. އަދި އެ ފޯމުތަކުގެ ތެރެއިން %59.6 ފޯމުތަކަކީ ޝަރުތުހަމަނުވާ ފޯމުތަކެއް ކަމަށް އޭސީސީއިން ވަނީ ބުނެފަ އެވެ.
ޝަރުތު ހަމަނުވާ މީހުންގެ ތެރޭގައި ކައުންސިލްތަކާއި ކުންފުނިތަކުން ދޮގު ލިޔެކިޔުންތައް ހުށަހެޅުމާއި ކުރިން ސޯޝަލް ހައުސިން ސްކީމަކުން ބޯހިޔާވަހިކަން ލިބިފައިވާ ފަރާތްތައް ހިމެނޭ ކަމަށް އޭސީސީއިން ބުނެ އެވެ.
