ދެވަނަ ޑިވިޝަން ފުޓްބޯޅަ މުބާރާތުގެ ފުރަތަމަ ޑިވިޝަނަށް ޕްރޮމޯޓުވުމާއެކު މަސްއޮޑި ސްޕޯރޓްސް ކްލަބުން މުބާރާތުގެ ފައިނަލްގެ ޖާގައެއް ކަށަވަރުކޮށްފިއެވެ.
ޓެންޓް ސްޕޯރޓްސް ކްލަބާ ވާދަކޮށް 5-1 ގެ ނަތީޖާއަކުން މަސްއޮޑި ކުރި ހޯދާފައިވަނީ މިއަދު ހަވީރު ކުޅެވުނު ސެމީ ފައިނަލް މެޗުގައެވެ. މަސްއޮޑިން ވަނީ މިއަދުގެ މެޗުގައި ފުރަތަމަ ގޯލު ޖަހައި ލީޑު ނަގައިފައެވެ. މި ގޯލް އެ ޓީމަށް ޖަހައިދީފައިވަނީ ހުސެއިން ޝަރީފެވެ.
މެޗުގެ ފުރަތަމަ ހާފް 1-1 ން އެެއްވަރުވިނަމަވެސް ދެވަނަ ހާފްގައި މަސްއޮޑިން ވަނީ އިތުރު ހަތަރު ލަނޑު ޖަހާފައެވެ. ކުޅުނު ހުރިހާ މެޗެއްވެސް ކާމިޔާބުކޮށްގެން ފައިނަލަށް ދަތުރުކުރި މަސްއޮޑި ޓީމުގެ ކޮޅަށް ގޯލެއް ވަން މިއީ ފުރަތަމަ ފަހަރެވެ. ގުރޫޕް ސްޓޭޖުގެ ހަތަރު މެޗު އެޓީމުން ނިންމާލީ ބައިކޮޅަށް ގޯލެއް ނުވަދެއެވެ.
ދެވަނަ ހާފްގެ ކުރީކޮޅު މަސްއޮޑިން ދެވަނަ ފަހަރަށް ލީޑް ނެގީ ޕެނަލްޓީ އަކުންނެވެ. އޭރިޔާ ތެރެއިން ކުރި ފައުލަކަށް ދިން ޕެނަލްޓީ ކާމިޔާބުކުރީ އިސްލާމް ފިކުރީއެވެ. އޭގެ މާގިނައިރެއް ނުވެ ތިންވަނަ ލަނޑެއް ޖެހީ އަބްދުالله ޒިޔާން އެވެ. ހަތަރުވަނަ ލަނޑު ޖެހީ އަބްލާތީ އެލް ސައީދު އެވެ. ފަހު ލަނޑު އިތުރު ވަގުތުގައި ޖެހީ އަބުދުالله ޒިޔާން އެވެ.
އަންނަ ހުކުރު ދުވަހު ކުޅެން ހަމަޖެހިފައިވާ ފައިނަލް މެޗުގައި މަސްއޮޑި ނުކުންނާނީ މާދަމާ ހަވީރު ނިއު ރޭޑިއަންޓާއި ވިކްޓަރީ ސްޕޯޓްސް ކްލަބް ބައްދަލުކުރާ ސެމީ ފައިނަލުން މޮޅުވާ ޓީމަކާ ދެކޮޅަށެވެ.
