ރަޖިސްޓްރީނުކޮށް ރާއްޖޭގައި ހިންގާ މީޑިއާތަކުގެ މައްސަލަތައް ބެލޭނެ ހަރުދަނާ ނިޒާމެއް އެކުލަވައިލަން، ކަމާ ގުޅޭ އުސޫލެއް ހަދައި، ދޮގު ޚަބަރު ފަތުރާ ވެބްސައިޓުތަކަށް ފިޔަވަޅު އަޅަން މޯލްޑިވްސް މީޑިއާ ކައުންސިލް (އެމްއެމްސީ)ން އިއްޔެ ނިންމައިފިއެވެ.
ރަޖިސްޓްރީނުކޮށް ހިންގާ މީޑިއާތަކުގެ މައްސަލަ ބޮޑުވުމުގެ ސަބަބުން މި ފަހުން ދެ ވެބްސައިޓެއް ބްލޮކް ވެސް ކުރި ނަމަވެސް، ފަހުން ވަނީ ވެބްސައިޓުތައް އަންބްލޮކް ކޮށްފައެވެ.
މީޑިއާ ކައުންސިލުން މިއަދު ނެރުނު ބަޔާނެއްގައި ބުނީ، މީޑިއާ ކައުންސިލްގެ ގާނޫނު ބުނާ ގޮތުން ރަޖިސްޓްރީނުކޮށް ހިންގާ ވެބްސައިޓުތަކަކީ ވެސް މީޑިއާ ކަމަށާއި އެހެންކަމުން އެ މީޑިއާތައް މޮނިޓާކޮށް ބެލެހެއްޓުމުގެ ޒިންމާ ވެސް އެ ކައުންސިލަށް ގާނޫނުން މަތިކޮށްފައިވާ ކަމަށެވެ.
އެމްއެމްސީން ބުނީ ރަޖިސްޓްރީނުކޮށް ހިންގާ ތިން މީޑިއާއެއްގެ މައްސަލަ ބޮޑުވެ، ގިނަ ޝަކުވާތަކެއް ލިބިފައިވާ ކަމަށެވެ.
- ދިޔަވަރު.ކޮމް
- ކުރުސީ.ކޮމް
- ދޮންއަމާ.ކޮމް
މަތީގައިވާ ތިން ވެބްސައިޓުން ރައްޔިތުންނަށް ހަގީގަތް އޮޅޭ ގޮތަށް ދޮގި މައުލޫމާތު ފަތުރަމުން އަންނަ ކަމަށް ބުނެ ގިނަ އަދަދެއްގެ ޝަކުވާތައް ލިބިފައިވާއިރު، އެމްއެމްސީގެ ބަޔާނުގައި ބުނީ ކަނޑައެޅިގެން ހަގީގަތާ ހިލާފު މައުލޫމާތު އެ ތިން ވެބްސައިޓުގައި ވެސް ޝާއިއުކޮށްފައިވާ ކަމަށާއި، އެހެންކަމުން، އެމްއެމްސީން އެ މައްސަލަ ބަލަމުން އަންނަ ކަމަށެވެ.
އެ ކައުންސިލުން ބުނީ، ހަގީގަތާ ހިލާފު މައުލޫމާތު ފަތުރަމުން އަންނައިރު އެއްވެސް ފިޔަވަޅެއް ނޭޅި އޮތުމަކީ އެ ކައުންސިލްގެ ގިނަ މެންބަރުން ކަންބޮޑުވާ ކަމެއް ކަމަށެވެ. އެހެންކަމުން، ރަޖިސްޓްރީނުކުރާ މީޑިއާތަކުގެ މައްސަލަ ބެލޭނެ ހަރުދަނާ ނިޒާމެއް ގާއިމުކުރުމަށްޓަކައި ކަމާ ގުޅޭ އުސޫލެއް އެކުލަވައިލަން ވަނީ ނިންމައިފައެވެ.
