ވަޒީފާ އަދާކުރާ ކޮންމެ ދިވެހި މުވައްޒަފަކަށް ރޯދަ އިނާޔަތް ރޯދައިގެ ކުރިން ދިނުމަށް ލޭބާ ރިލޭޝަންސް އޮތޯރިޓީން ހަނދާން ކޮށްދީފިއެވެ.
އެ އޮތޯރިޓީން ކޮށްފައިވާ އިއުލާނެއްގައި ބުނެފައިވަނީ ވަޒީފާއާބެހޭ ގާނޫނުގެ 51 ވަނަ މާއްދާގެ (ހ) ގައި ބަޔާންކޮށްފައިވާ ގޮތުގެމަތިން، ވަޒީފާ އަދާކުރާ ކޮންމެ ދިވެހި މުވައްޒަފަކަށް ރަމަޟާން މަހުގެ އިނާޔަތް ރޯދަ މަސް ފެށިމުގެ ކުރިން ދޭން ޖެހޭނެ ކަމަށާއި، ރަމަޟާން މަސް ފެށުމުގެ ކުރިން 3,000ރ. ދޭން ވާނެ ކަން ވަނީ ހަނދާންކޮށް ދީފައެވެ.
އޭގެތެރޭގައި ރައްޔިތުންގެ މަޖިލީހުން މުސާރަ އާއި އިނާޔަތްތައް ކަނޑައަޅާ ފަރާތްތައް ވެސް ހިމެނިގެންދާނެއެވެ.
އަދި ހަމައެއާއެކު ބައެއް ތަންތަނުން ގާނޫނުގައި ބަޔާންކޮށްފައިވާ ގޮތަށް އެ އިނާޔަތް ދެމުން ނުދާކަން ވެސް އެ އޮތޯރިޓީން ވަނީ ފާހަގަކޮށްފައެވެ އެހެންކަމުން ވަޒީފާ ދީގެން މުވައްޒަފުން ގެންގުޅޭ އެންމެހައި ފަރާތްތަކުން ވެސް، ވަޒީފާއާބެހޭ ގާނޫނާ އެއްގޮތްވާ ގޮތުގެ މަތިން، މިއަހަރުގެ ރަމަޟާން މަހުގެ އިނާޔަތް ދިނުމަށް ވަނީ އެދިފައެވެ.
ކަލަންޑަރުގައިވާގޮތުން މިއަހަރުގެ މުލަރޯދަ ދުވަހަކީ އަންނަ މާރޗު މަހުގެ 11 ވަނަ ދުވަހެވެ.
ރާއްޖޭގައި ވަޒީފާ އަދާކުރާ ބިދޭސީ މުސްލިމު މުވައްޒަފުންނަށް ރޯދަ މަހުގެ އިނާޔަތް ދިނުމަކީ ވަޒީފާދޭ ފަރާތަށް އިހުތިޔާރު ލިބިގެންވާ ކަމެއް ކަމަށް ގާނޫނުގައި ބުނެފައިވެއެވެ. އެ އިހުތިޔާރުގެ ދަށުން، ރޯދަ އިނާޔަތް ދިނުމުގައި ޕަބްލިކް ސެކްޓާގައި މަސައްކަތްކުރާ ބިދޭސީ މުސްލިމް މުވައްޒަފުންނާ މެދު އަމަލުކުރަން ޖެހެނީ ދިވެހި މުވައްޒަފުންނާ މެދު އަމަލުކުރަން ބަޔާން ކޮށްފައިވާ ގޮތުގެ މަތީންނެވެ.
