މަސްވެރިން ކިރި މަހަށް ފައިސާ ނުދޭ މައްސަލައިގައި ގއ. ކޫއްޑުގައި މުޒާހަރާ ކުރަމުންދާ މަސްވެރިންނާ ބައްދަލު ކުރެއްވުމަށް ފިޝަރީޒް މިނިސްޓަރު އަހުމަދު ޝިޔާމް ކޫއްޑޫ އަށް ދަތުރު ކުރެއްވުމަށް ނިންމަވައިފިއެވެ.
މަސްވެރިން ކިރި މަހަށް ފައިސާ ނުލިބޭ ކަމަށް ބުނެ މިއަދު ހެނދުނުން ފެށިގެން މަސްވެރިން ދަނީ ކޫއްޑުގައި މުޒާހަރާ ކުރަމުންނެވެ.
މިނިސްޓަރު ޝިޔާމް ވިދާޅުވީ ކޫއްޑޫގައި މުޒާހަރާ ކުރަމުންދާ މަސްވެރިންނާ ބައްދަލު ކުރެއްވުމަށްޓަކައި ށ. އަތޮޅުން މިހާރު ދަތުރު ފައްޓަވާފައިވާ ކަމަށެވެ.
މަސްވެރިންނަށް ނުދީ ހުރި 280 މިލިއަން ރުފިޔާ އަންނަ މަހުގެ ފަސް ވަނަ ދުވަހުގެ ނިޔަލަށް ދީ ނިންމާނެ ކަމަށް ޝިޔާމް ވަނީ ވިދާޅުވެފައެވެ.
މިކަމާ ގުޅިގެން އިހުތިޖާޖުގައި ބައިވެރިވި މަސްވެރިއަކު ބުނީ މުޒާހަރާ ހުއްޓާލާނީ މިނިސްޓަރު ވަޑައިގެން އެމީހުންނާ ބައްދަލުކޮށް މަސްވެރިންގެ ކަންބޮޑުވުންތަކަށް ހައްލު ގެނެސްދިނުމުން ކަމަށާއި އަދި މުޒާހަރާ ކުރިއަށްދާހާ ހިނދަކު ކޫއްޑޫގެ އޮޕަރޭޝަންތައް ކުރިއަށް ގެންދަން ފުރުސަތު ނުދޭނެ ކަމަށް ބުނެފައިވެއެވެ.
