މަސްވެރިންނަށް ދޭން ޖެހޭ 300 މިލިއަން ރުފިޔާ ރޯދައިގެ ކުރިން ދައްކައި ނިންމުމަށް މިދަނީ މަސައްކަތްކުރަމުން ކަމަށް ރައީސް ޑރ. މުއިއްޒު ވިދާޅުވެއްޖެއެވެ.
ރައީސް މިފަދައިން ވިދާޅުވެފައިވަނީ އައްޑޫ ސިޓީއަށް ރައީސް ކުރައްވަމުން ގެންދަވާ ދަތުރުފުޅުގެ ތެރެއިން މިއަދު ހަވީރު މަރަދޫފޭދޫއަށް ވަޑައިގެން، ރައްޔިތުންނާ ބައްދަލުކުރައްވައި ވާހަކަފުޅުދައްކަވަމުންނެވެ.
އެގޮތުން ރައީސް ވިދާޅުވީ އެންމެ ކުރު މުއްދަތެއްގެ ތެރޭގައި އެންމެ ގިނަ ފައިސާ މަސްވެރިންނަށް ދޫކުރި ސަރުކާރަކަށް މި ސަރުކާރު ވާނެ ކަމަށާއި އެމަނިކުފާނު ވެރިކަމާ ހަވާލުވެވަޑައިގެންނެވި އިރު، މަސްވެރިންނަށް 200 އެތައް މިލިއަން ރުފިޔާ ދައްކަން އޮތް ކަމަށެވެ.
އެއަށް ފަހު ވެސް މިހާރު 298 މިލިއަނެއްހާ ރުފިޔާ މަސްވެރިންނަށް ދޭން ޖެހިފައިވާ ވާ ކަން ފާހަގަ ކުރައްވަމުން ރައީސް ވިދާޅުވީ އެ ފައިސާ ރޯދައިގެ ކުރިން ދެއްވާނެ ކަމަށެވެ. އަދި އެ ފައިސާ ދިނުމަށް ފަހު ދެމެހެއްޓެނިވި ގޮތެއްގައި މަސްވެރިންނަށް ފައިސާ ދިނުމުގެ ކަންކަން އިންތިޒާމްކޮށްގެން ކުރިއަށް ގެންދިއުމަށް ރާވާފައިވާ ކަމަށް ވެސް ރައީސް ވިދާޅުވިއެވެ.
މިފްކޯއިން މަސްކިރުމަށް ފަހު މަސްވެރިންނަށް ދޭން ޖެހޭ ފައިސާ ނުލިބި އެތައް މަސްތަކެއް ވެފައިވާތީ ގއ. ކޫއްޑޫގައި މަސްވެރިން ވަނީ މިއަދު މުޒާހަރާކޮށް އެ ކާރުހާނާގެ އޮޕަރޭޝަންތައް ހުއްޓުވާލައިފައެވެ. އެކަމާ ގުޅިގެން މިއަދު ފިޝަރީޒް މިނިސްޓަރު އަހްމަދު ޝިޔާމް ކޫއްޑޫއަށް ވަޑައިގަތުމުން އެ ރަށުގައި މަސްވެރިން ވަނީ އިހުތިޖާޖުކޮށް، ޝުއޫރު ފާޅުކޮށްފައެވެ.
