މަސްވެރިންނަށް ނުދެވި ހުރި 300 މިލިއަން ރުފިޔާގެ ތެރެއިން 100 މިލިއަން ރުފިޔާ މި މަހު ދޭން ސަރުކާރުން ނިންމައި އެގޮތަށް ހުށަހެޅުމުން ވެސްހުރިހާ ފައިސާއެއް ނުދެނީސް ގއ. ކޫއްޑޫން ނުފައިބާނެ ކަމަށް އެ ރަށުގައި މުޒާހަރާކުރާ މަސްވެރިން ބުނެފި އެވެ.
އިއްޔެ ހެނދުނު ކޫއްޑޫގައި މަސްވެރިން މުޒާހަރާ ފެށީ މަސްވެރިންނަށް ދޭންޖެހޭ ފައިސާ ނުލިބި ތިން މަސްވެއްޖެ ކަމަށް ބުނެ، އެކަމުގެ ކަންބޮޑުވުންފާޅުކުރުމަށެވެ. އެކަމާ ގުޅިގެން ފިޝަރީޒް މިނިސްޓަރު އަހުމަދު ޝިޔާމް އިއްޔެ ވަނީ އިއްޔެ ކޫއްޑޫ އަށް ވަޑައިގެން މަސްވެރިންނާ ބައްދަލުކުރައްވައިފަ އެވެ.
އެ ބައްދަލުވުމަށް ފަހު މިނިސްޓަރު ދޯނިތަކުގެ ކެޔޮޅުންނާ ބައްދަލުކުރެއްވި އެވެ. އެ ބައްދަލުވުމުގައި ބައިވެރި ދޯންޏެއްގެ ކެޔޮޅަކު ބުނީ މަސްވެރިންނަށްދޭންޖެހޭ ފައިސާ އެއްކޮށް ނުދޭ ނަމަ އިހުތިޖާޖު ނުހުއްޓަން ނިންމާފައިވާ ކަމަށެވެ.
އޭނާ ބުނީ ކޫއްޑޫގައި ކުރަމުންދާ މުޒާހަރާ ހުއްޓާލައި، މަސްވެރިން އެ ރަށުން ފައިބައިގެންދާނީ ސަރުކާރުން ގަނެފައި ހުރި މަހަށްވާ ފައިސާ އެއްކޮށްދީނިންމުމުން ކަމަށާއި .
ފައިސާ ދިނުމުން ނޫނީ މުޒާހަރާ ހުއްޓާނުލަން ނިންމި ސަބަބަކީ މީގެ ކުރިން ވެސް ސަރުކާރާ ވާހަކަ ދެކެވި، އެކަމަށް ހައްލެއް ނުލިބުމުން ކަމަށް އޭނާބުންޏެވެ.
ތިން މަސް ދުވަހަކީ ސަރުކާރަށް، މަސްވެރިންނަށް ފައިސާ ދިނުމަށް ދިން ވަރަށް ގިނަ ދުވަސް ކަމަށާއި ސަރުކާރުން ދައްކާ ވާހަކަތައް ގަބޫލުކުރަން ދަތިކަމަށް އޭނާ ބުންޏެވެ.
އިއްޔެ މަސްވެރިންނާ އެކު ބޭއްވި ބައްދަލުވުމުގައި މިނިސްޓަރު ވިދާޅުވެފައި ވަނީ މަސްވެރިން ބާނާ މަހަށް ފައިސާ ނުލިބިގެން އަންނަ މަހުގެ ފަހަކުންފެށިގެން މުޒާހަރާކުރަން ނުޖެހޭނެ ކަމަށެވެ.
ސަރުކާރުން ނިންމާފައި ވަނީ ލޯނެއް ނަގައިގެން ވިޔަސް މަސްވެރިންނަށް ދޭން ޖެހޭ ފައިސާ ދީ ނިންމުމަށެވެ.
