ފަނޑިޔާރުންގެ ބައިވެރިވުން އިތުރުކުރުމަށް ޖޭއެސްސީއަށް ލަފާދޭ ބޯޑެއް އެކުލަވާލަން ނިންމައިފިއެވެ.
ޖޭއެސްސީން ނެރުނު ބަޔާނެއްގައި ބުނީ އެފަދަ ބޯޑެއް އެކުލަވާލަން ނިންމީ ކޯޓުތަކުގެ އިދާރީ ހިންގުމާ ގުޅޭގޮތުން ސިޔާސަތު އެކަށައަޅާއިރު އަދި ފަނޑިޔާރުންގެ ބައިވެރިވުން އިތުރުކުރުމަށް އަދި ޖުޑީޝަލް އެޑްމިނިސްޓްރޭޝަންގެ ކަންކަމުގައި އެކުލަވާލާ ސިޔާސަތުތަކަކީ ހާމަކަން ބޮޑު އަދި ފަނޑިޔާރުންނާ މަޝްވަރާ ކުރެވިގެން އެކުލަވާލެވޭ ސިޔާސަތުތަކެއް ކަމަށް ހެދުމަށްޓަކާ ކަމަށެވެ.
އެގޮތުން މި ބޯޑުގައި ސިޔާސަތުތައް އެކުލަވާލާނީ ފަނޑިޔާރުންނާ މަޝްވަރާ ކުރެވިގެންކަމަށާއި، ރާއްޖޭގެ އަދުލު އިންސާފު ގާއިމުކުރުމުގެ ބާރުގެ އާންމު އިދާރީ ކަންކަން ކުރުމުގައި ފަނޑިޔާރުންގެ ފަރާތުން ޖުޑީޝަލް ސާވިސް ކޮމިޝަނަށް ލަފާދިނުމަށްކަމަށްވެސް ވަނީ ބުނެފައެވެ.
އެގޮތުން މި ބޯޑުގައި ހިމެނޭ މެމްބަރުންނަކީ:
- އުއްތަމަފަނޑިޔާރު
- ޖުޑީޝަލް ސާވިސް ކޮމިޝަނުގެ ރައީސް
- ހައި ކޯޓުގެ އިސްފަނޑިޔާރު
- ސުޕްރީމް ކޯޓުގައި ހިމެނޭ ފަނޑިޔާރުންގެ ތެރެއިން، އެ ކޯޓު، ޖޭއެސްސީގައި ތަމްސީލްު ކުރައްވާ ފަނޑިޔާރު
- ހައި ކޯޓުގައި ހިމެނޭ ފަނޑިޔާރުންގެ ތެރެއިން، އެ ކޯޓު، ޖޭއެސްސީގައި ތަމްސީލު ކުރައްވާ ފަނޑިޔާރު
- ދަށު ކޯޓުތަކުގެ ފަނޑިޔާރުންގެ ތެރެއިން، އެ ކޯޓުތައް، ޖޭއެސްސީގައި ތަމްސީލުކުރައްވާ ފަނޑިޔާރު
- ސުޕީރިއަ ކޯޓުތަކުގެ އިސްގާޒީންގެ ތެރެއިން އުއްތަމަ ފަނޑިޔާރު އައްޔަން ކުރައްވާ ފަނޑިޔާރަކު
- މެޖިސްޓްރޭޓް ކޯޓުތަކުގެ މެޖިސްޓްރޭޓުންގެ ތެރެއިން އުއްތަމަ ފަނޑިޔާރު އައްޔަންކުރައްވާ ފަނޑިޔާރަކު
- ޗީފް ޖުޑީޝަލް އެޑްމިނިސްޓްރޭޓަރު
މީގެއިތުރުން ޖުޑީޝަލް ސާވިސް ކޮމިޝަނުން ބުނެފައިވަނީ ސުޕީރިއާ ކޯޓުތަކުގެ އިސްގާޒީންގެ ތެރެއިން އުއްތަމަފަނޑިޔާރު އައްޔަންކުރައްވާ ފަނޑިޔާރާއި، މެޖިސްޓްރޭޓް ކޯޓުތަކުގެ މެޖިސްޓްރޭޓުންގެ ތެރެއިން އުއްތަމަފަނޑިޔާރު އައްޔަންކުރައްވާ ފަނޑިޔާރަކު އައްޔަނުކުރެވޭނީ ފަނޑިޔާރުންގެ މެދުގައި ބަހާލެވޭ އުސޫލަކުން ކޮންމެ އަހަރަކު 1 ފަހަރު ބަދަލުވާ ގޮތަށްކަމަށެވެ.ހަބަރު
