ލެބޯޓްރީގެ ހިދުމަތް ލިބެންނެތް 72 ރަށުގައި ލެބޯޓްރީގެ ހިދުމަތް ފެށުމުގެ މަޝްރޫއ ނައިބު ރައީސް ހުސައިން މުހައްމަދު ލަތީފް އިފުތިތާހު ކޮށްދެއްވައިފިއެވެ.
މި މަޝްރޫއު އިފްތިތާހު ކޮށްދެއްވީ މިއަދު މެންދުރުފަހު ދަރުމަވަންތަ ހޮސްޕިޓަލުގެ އުޑުވިލާ މާލަމުގައި ކުރިއަށްދިޔަ ރަސްމިއްޔާތުގައެވެ.
އެގޮތުން ނައިބު ރައީސް ވިދާޅުވީ ދިވެހިރާއްޖޭގެ އެކި ކަންކޮޅުތަކުގައި ދިރިއުޅޭ ރައްޔިތުންނަށް މިހާރަށްވުރެ ރަނގަޅު ފެންވަރެއްގައި ސިއްހީ ހިދުމަަތް ފޯރުކޮށްދިނުމަކީ މި ސަރުކާރުން ވަރަށް ބޮޑު އަހުމިއްޔަތުކަމެއް ދެއްވައިގެން ކުރަމުން އަންނަ މަސައްކަތެއް ކަމަށެވެ.
އަދި ދިވެހިރާއްޖޭގައި މީހުން އާބާދުވެފައިވާ ކޮންމެ ރަށެއްގައި، ސިއްހީ ފަރުވާއަށް ބޭނުންވާ ލެބޯޓްރީގެ ހިދުމަތް ފުޅާކުރުމުގެ މަޝްރޫއެއްގެ ތަންފީޒުކުރަން ފެށުމަކީ، ރައީސްގެ ހަފުތާ 14 އެޖެންޑާގައި ހިމެނޭ މުހިންމު ވައުދެއްކަމުގައިވެސް ވަނީ ފާހަގަކުރައްވާފައެވެ.
ނައިބު ރައީސް އިތުރަށް ވިދާޅުވީ މިހާތަނަށް ލެބޯޓްރީއެއްނެތް 4 ރަށެއްގައި މިއަދު މި ހިދުމަތް ދޭން ފަށާނެކަމަށާއި އަދި މި އަހަރުގެ މޭ މަހުގެ ކުރިން، ލެބޯޓްރީ ނެތް ބާކީ 72 ރަށުގައިވެސް މި ހިދުމަތް ދޭން ފަށާނެކަމަށެވެ.
