ރައީސް ޑރ. މުޙައްމަދު މުއިއްޒު ވެރިކަމާ ހަވާލުވެވަޑައިގަތް ފަހުން މިހާތަނަށް 522 މިލިއަން ރުފިޔާ މަސްވެރިންނަށް ދޫކޮށްފައިވާ ކަމަށް ފިޝަރީސް މިނިސްޓަރު އަހުމަދު ޝިޔާމް ވިދާޅުވެއްޖެއެވެ.
ޝިޔާމް މިހެން ވިދާޅުވީ ރައީސް މިހާރު އަތޮޅުތަކަށް ކުރައްވަމުން ގެންދަވާ ރަސްމީ ދަތުރުގައި އިހަވަންދޫއަށް ކުރެވިއްވި ދަތުރުގައި ބޭއްވުނު ހާއްސަ ޖްލްސާގައި ވާހަކަ ދައްކަވަމުން ނެވެ.
ޝިޔާމް ވިދާޅުވީ ފައިސާ ޗާޕުނުކުރި ނަމަވެސް މި ސަރުކާރުން މަސްވެރިންނަށް ދޫކުރެވިފައި ހުރި ތެލާއި އައިސް ހިމެނޭ ގޮތަށް 522 މިލިއަން ރުފިޔާ މިއަދާ ހިސާބަށް ދައްކަވާފައިވާ ކަމަށެވެ. އެހެން ނަމަވެސް އަދިވެސް މަސްވެރިން ދައްކަން ޖެހި، ނުދައްކާ ފައިސާ ހުރިކަން އޭނާ ފާހަގަކުރެއްވިއެވެ.
ރައީސް އެ މައްސަލަ އެއްކޮށް ހައްލުކޮށް ދެއްވާނެކަމަށް ވިދާޅުވެފައިވާކަން އޭނާ ފާހަގަކުރެއްވިއެވެ.
މަސްވެރިންނަށް ދޭންޖެހޭ ފައިސާ ނުލިބޭތާ ތިން މަސްދުވަސް ވެފައިވާކަމަށް ބުނެ މިދިޔަ އާދިއްތަ ދުވަހު މަސްވެރިން ގއ. ކޫއްޑޫގައި މުޒާހަރާ ކުރަން ފެށިއެވެ. އެ މުޒާހަރާ ހޫނުވެ، މަސްވެރިން ކޫއްޑޫގެ އޮޕަރޭޝަން ހުއްޓުމަކަށް ގެނައެވެ.
އެ މުޒާހަރާ ހުއްޓާލާފައިވަނީ ދެ ދުވަސް ފަހުން މަސްވެރިންނަށް ފައިސާ ދޫކުރަން ފެށުމުންނެވެ. އެގޮތުން މިދިޔަ ހަފުތާ ތެރޭގައި 70 މިލިއަން ރުފިޔާ ދީފައިވާއިރު އަންނަ ހޯމަ ދުވަހުގެ ކުރިން 30 މިލިއަން ދީ ނިންމާނެކަމަށް ފިޝަރީޒް މިނިސްޓްރީންވަނީ ބުނެފައެވެ.
