ފުލުހުންގެ ބެލުމުގެ ދަށުގައި ހުއްޓައި މަރުވި ގދ. ހޯނޑެއްދޫ/ ސްވެން، އަބްދުﷲ ރަޝީދުގެ މަރުގެ މައްސަލައިގައި، ފުލުހުންގެ އޮޕަރޭޝަނަލް އެއްވެސް މައްސަލައެއް މިހާތަނަށް އަދި ފާހަގަވެފައިނުވާ ކަމަށް ހޯމްލޭންޑް ސެކިއުރިޓީ އެންޑް ޓެކްނޮލޮޖީ މިނިސްޓަރު އަލީ އިހުސާން ވިދާޅުވެއްޖެއެވެ.
ގދ. ހޯޑެއްދޫގައި ފުލުހުން ހިންގި ޑްރަގް އޮޕަރޭޝަނެއްގައި 25 އޮކްޓޫބަރު 2022 ވަނަ ދުވަހުގައި ހައްޔަރު ކޮށްފައިވާ އަބްދުﷲ ރަޝީދު ފުލުހުންގެ ބެލުމުގެ ދަށުގައި ހުއްޓައި މަރުވީ އޭނާގެ މެއަށް ތަދުވެ، ސީޒާއެއް ޖެހޭ ފަދަ އަލާމާތްތަކެއް ފެނުމަށްފަހުގައި ކަމަށާއި އަދި އޭނާ ގދ. މަޑަވެލީ ސިއްހީ މަރުކަޒަށް ގެންދިޔަ އިރުވެސް މަރުވެފައިވާ ކަމަށް އޭރު ފުލުހުން މައުލޫމާތު ދީފައިވެއެވެ.
ރައްޔިތުންގެ މަޖިލީހުގެ އިއްޔެގެ ޖަލްސާގެ ވަޒީރުންނާ ސުވާލުކުރުމުގެ ވަގުތުގައި އަބްދުﷲ ރަޝީދުގެ މައްސަލައާ ބެހޭގޮތުން މިނިސްޓަރު އިހުސާނާ މަޑަވެލީ ދާއިރާގެ މެންބަރު ހުސައިން ފިރުޝާން ސުވާލު ކުރައްވާފައިވާއިރު.
އެ ސުވާލަށް ޖަވާބު ދެއްވަމުން މިނިސްޓަރު ވިދާޅުވީ، އެ މައްސަލައިގައި ދައުވާކުރަން ފޮނުވާފައި އޮތްކަން މިނިސްޓަރަށް އެނގިވަޑައިގެންނެވީވެސް މީޑީއާތަކުން ކަމަށާއި، އަދި އެ މައްސަލައިގެ ރިޕޯޓު ހިއްސާކުރުމަށް ނެޝަނަލް އިންޓަގްރިޓީ ކޮމިޝަންގައި މިހާރު ވާނީ އެދިފައި ކަމަށްވެސް ވިދާޅުވިއެވެ.
މިނިސްޓަރު ވިދާޅުވީ މި މައްސަލައާ ގުޅިގެން ފުލުހުންގެ އޮޕަރޭޝަނަލް މައްސަލަތަކެއް ހުރިތޯ ފުލުހުންގެ ތެރެއިން ބަލާނެ ކަމަށެވެ.
