ސަރުކާރުން ފައްޓަވާފައިވާ ރަސްމާލެ މަޝްރޫއަކީ ކޮރަޕްޝަން ކަމަށް ކުރީގެ ރައީސް ޔާމީން ވިދާޅުވެއްޖެއެވެ.
ރައީސް ޔާމީން މިހެން ވިދާޅުވީ ރައީސް ޔާމީން ހައްދަވާ އާ ޕާޓީ ޕީޕަލްސް ނެޝަނަލް ކޮންގްރެސް (ޕީއެންއެފް)ގެ އާންމު މެމްބަރެއް ކުރެއްވި ސުވާލަށް ޖަވާބު ދެއްވަމުންނެވެ. ޔާމީން ވިދާޅުވީ މި ކަހަލަ މަޝްރޫއުތަކަށް ފައިސާ ހަރަދު ކުރެވޭނީ ބަޖެޓުން ކަމަށާއި, ދައުލަތުގެ ބަޖެޓުގައި ޖަހާ ފާސްކޮށްގެން މެނުވީ މިކަހަލަ މަޝްރޫއެއް ގެންދިއުން ގާނޫން އަސާސީއިން މަނާ ކުރާ ކަމެއްކަމަށެވެ..
“މިހާރު އެ އޮތީ ރަސްމާލެ ހުއްޓާލާފައި. އެހެންވީމާ މި ކޮރަޕްޝަނަކަށް ނުވާނެ ގޮތެއް އަޅުގަނޑުގެ ފޮތަކުން ނުފެނޭ. އޭސީސީ އަކަށް މިއެއް ނުފެނޭ،” ޔާމީން ވިދާޅުވި އެވެ.
99 އަހަރަށް ހުޅުމާލޭން 10 ހެކްޓަރުގެ ބިމާއި ފުށިދިއްގަރުފަޅުން ހިއްކާ ބިމުން 60 ހެކްޓަރުގެ ބިން ސްރީ ލަންކާގެ ކެޕިޓަލް މެރިން އެންޑް ސިވިލް ކޮންސްޓްރަކްޝަން ކޮމްޕެނީ (ސީއެމްސީސީ) އަށް ދީގެން އަގު އަދާކުރަން ހަމަޖެހިފައި މި މަޝްރޫއަކީ 1،153 ހެކްޓަރުގެ ބޮޑު ސަރަހައްދެއް ހިއްކުމަށް ވަނީ ހަމަޖެހިފަ މަޝްރޫއެކެވެ. ބިން ހިއްކުމުގެ މަސައްކަތް 8 މަސް ދުވަހުގެ ތެރޭގައި ނިންމޭނެ ކަމަށް ކުރިން ސަރުކާރުން ބުނެފައިވެއެވެ.
ދެރައީސުންގެ ދެމެދުގައި ޖެހިފައިވާ ހިޔާލުތަފާތުވުމާއި އެކުގައި ރައީސް ޔާމީން ވަނީ ޕީޕީއެމް ދޫކޮށް އަމިއްލަފުޅު އާ ޕާޓީއެއް އުފެއްދެވުމުގެ މަސައްކަތް ފައިޓަވައިފައިއެވެ. ލުއި ތަކަކާއި އެކުގައި ރައީސް ޔާމީން ގޭ ބަންދުގައި ހުއްޓަސް ޔާމީން އަދިވެސް ދަނީ އާރަށް ކުއްޔަށް ދޫކުރުމުގައި ޚިޔާނާތްވެ، އެ ފައިސާ ލޯންޑާ ކުރިކަމުގެ ހުކުމް ސާބިތުވެ 11 އަހަރުގެ ޖަލު ހުކުމް ތަންފީޒުކުރަމުންނެވެ.
ޕީއެންއެފްގެ ޖަލަސްތަކުގައި ވާހަކަ ދައްކަމުން ރައީސް ޔާމީން ދަނީ ރައީސް ޑރ. މުހައްމަދު މުއިއްޒުގެ ސަރުކާރަސް ފާޑު ވިދާޅުވަމުންނެވެ.
