ރައްޔިތުންގެ މަޖިލީހުގެ ސާޖަންޓް އެޓް އާމްސްގެ މަގާމަށް، ކުރިން ސިފައިންގޭގައި ގިނަ ދުވަސް ތަކެއް ވަންދެން ހިދުމަތް ކުރައްވާފައިވާ ތޮލްހަތު ހަސަން އައްޔަން ކުރަން ރައްޔިތުންގެ މަޖިލީހުން އިއްޔެ ފާސްކޮށްފިއެވެ.
ސާޖެންޓް އެޓް އާމްސްއަކީ، ރައްޔިތުންގެ މަޖިލީހުގެ އަމީންއާންމުގެ މަގާމާ ޖެހިގެން ދެ ވަނައަށް އެންމެ އިސްވެރިޔާ އެވެ.
ސާޖަންޓް އެޓް އާމްސްގެ މަގާމަށް ތޮލްހަތު އައްޔަން ކުރަން ފާސް ކޮށްފައިވަނީ މަޖިލިހުގެ ތަޅުމުގައި އިއްޔެ ނަގާފައިވާ ވޯޓުގައި ބައިވެރިވެވަޑައިގެންނެވި 35 މެމްބަރުންގެ އިއްތިފާގުންނެވެ.
ތޮލްހަތު އެމްއެންޑީއެފުން ރިޓަޔާ ކުރެއްވުމުގެ ކުރިން ހުންނެވީ މޭޖާގެ ރޭންކުގަ އެވެ. ތޮލްހަތު ވަނީ 21 އަހަރު ވަންދެން އެމްއެންޑީއެފްގައި ގައުމަށް ހިދުމަތް ކުރައްވާފައެވެ.
ތޮލްހަތަކީ ކުރީގެ ރައީސް އިބްރާހިމް މުހައްމަދު ސޯލިހުގެ ސަރުކާރުގައި ސްޓެލްކޯގެ ބޯޑަށް ވެސް އައްޔަން ކުރެއްވި ބޭފުޅެކެވެ.
