1،000 ހައުސިން ޔުނިޓުގެ މަޝްރޫއެއް އޭދަފުށީގައި ވަރަށް އަވަހަށް ފައްޓަވާނެ ކަމަށް ރައީސް ޑރ. މުއިއްޒު ވިދާޅުވެއްޖެއެވެ.
ރައީސް ވިދާޅުވީ މެނިފެސްޓޯގައި ފާހަގަކުރައްވާފައިވާނީ ރާއްޖޭގެ އެންމެ އުތުރުގެ ހަތަރު އަތޮޅާއި ދެކުނުގެ ހަތަރު އަތޮޅުގެ އިތުރުން މެދުރާއްޖެތެރޭގެ ހަތް ރަށެއް އާބަން ސެންޓަރުތަކުގެ ގޮތުގައި ތަރައްގީކުރެއްވުމަށް ކަމަށާއި އެ ހަތް ރަށުގެ ތެރޭގައި އޭދަފުށި ހިމެނޭ ކަމަށެވެ.
ރައީސް މިފަދައިން ވިދާޅުވެފައިވަނީ މިމަހުގެ 21 ވަނަ ދުވަހު ބާއްވާ ރައްޔިތުންގެ މަޖިލީހުގެ އިންތިހާބުގައި ޕީއެންސީގެ ފަރާތުން އޭދަފުށި ދާއިރާއަށް ވާދަކުރައްވާ އެ ދާއިރާގެ މިހާރު ވެސް މެމްބަރު އަހުމަދު ސަލީމުގެ ކެމްޕޭން ޖަލްސާގައި ވާހަކަފުޅު ދައްކަވަމުންނެވެ.
ރައީސް ވިދާޅުވީ އޭދަފުށި، އާބަން ސެންޓަރެއްގެ ގޮތުގައި ކަނޑައެޅުމުން، އެ ރަށުގެ ރައްޔިތުންނަށް ދިމާވެފައިވާ ބޯހިޔާވަހިކަމުގެ މައްސަލައަށް ހައްލު ހޯދަން މަސައްކަތްކުރައްވާނެ ކަމަށެވެ. އެގޮތުން ރައްޔިތުން ތިބީ ސަރުކާރަށް ތާއީދުކުރާ މެމްބަރުން މަޖިލީހަށް އިންތިހާބުކުރަން ތައްޔާރަށް ކަމަށާއި ސަރުކާރުން ހިންގަން ނިންމާފައިވާ މަޝްރޫއުތައް ކުރިއަށް ގެންދެވޭނީ އެއިރުން ކަމަށް ރައީސް ވަނީ ވިދާޅުވެފައެވެ.
ސަލީމްގެ އިސްނެގެމުގެ މަތިން މިހާރު އިނީޝިއަލް މަސައްކަތައްތައް ހިނގަމުންދާ ގޮތަށް ދާއިރުގައި ދާދި އަވަަހަށް އިރާދަކުރެއްވިއްޔާ ސަރުކާރުން ހުރިހާ ހުއްދައެއް އަޅުގަނޑުމެން ދީ ވަރަށް އަވަހަށް އޭދަފުށީގައި 1،000 ހައުސިން ޔުނިޓުގެ މަޝްރޫއެއް ފަށާނަން،–ރައީސް
