ތަރައްގީގެ މަޝްރޫތަކުގެ ނަތީޖާ ނެރުމަށް ސަރުކާރުގެ ކެންޑިޑޭޓުން މަޖިލީހަށް ހޮވަން ޖެހޭކަމަށް ރައީސް ޑރ. މުއިއްޒު ވިދާޅުވެއްޖެއެވެ.
ރައީސް މިފަދައިން ވިދާޅުވީ ކިނބިދޫ ދާއިރާގެ މަޖިލިސް ގޮނޑިއަށް ޕީއެންސީގެ ޓިކެޓުގައި ވާދަކުރާ ކެންޑިޑޭޓު، އަޝްރަގު އަލީގެ ކެމްޕޭން ޖަލްސާގައި ވާހަކަފުޅު ދަައްކަވަމުންނެވެ.
ރައީސް ވިދާޅުވީ ސަރުކާރުގެ ފަރާތުން މަޖިލީހުގެ އިންތިހާބުގައި ވާދަކުރާ ކެންޑިޑޭޓުން ރައްޔިތުން އިންތިހާބުކޮށްދޭންޖެހެނީ ނަތީޖާ ނެރުމަށްޓަކައި ކަމަށެވެ.
އަޅުގަނޑުގެ އަޒުމް ވަރަށް ވަރުގަދަ. ރައްޔިތުން އަޅުގަނޑާއި އެކު ކުރިއަށް ވަޑައިގަތީމަ ހުންނާނީ ރަނގަޅަށް. ނަތީޖާ ހުންނާނީ ނެރެދެވިފައި. ނަތީޖާ އަޅުގަނޑަށް ހުރިހާ ވެސް އެއްޗަކީ، ހުރިހާ ދާއިރާއެއްގައި ވެސް ހުރިހާ ރަށަކަށް ވެސް އަޅުގަނޑަށް މުހިންމީ ނަތީޖާ ނެރެދިނުން. ރައްޔިތުންގެ އަތްޕުޅުގައި މި އޮތީ ހަމަ އެންމެ ކަމެއް. ފާހަގައެއް ޖަހާލުން، 93 މަންދޫބުން 93 ދާއިރާ އަށް މިދެންނެވި ފާހަގަ ޖައްސަވަންވީ ނަތީޖާ ނެރުމަށް ޖަހައިދޭ ފާހަގަ.–ރައީސް
ރައީސް ވަނީ ސަރުކާރުގެ ކެންޑިޑޭޓުން އިންތިހާބުކޮށްދީ ރައްޔިތުންގެ އެއްބާރުލުން ލިބިއްޖެ ނަމަ، ކޮޅުމަޑުލު ރާއްޖޭގެ ތަރައްގީގެ ރާޑަރުގެ މެދަށް ގެނެވިފައިވާ އަތޮޅަކަށް ހައްދަވާނެ ކަމުގެ ޔަގީންކަން ދެއްވާފައެވެ.
