1445ވަނަ އަހަރުގެ ރަމަޟާން މަހުގެ ފަހު ދިހައިގެ ދުވަސްތައް ހިނގަމުންދާއިރު، މިމާތް މައްސަރުގައި ރޯދަ ހިފުމާއި އަޅުކަމުގައި ޝާމިލުވެ އުޅުމުން އަހަރުމެންގެ ހަށިގަނޑުތަކަށް ލިބިގެންދާ ފައިދާ ނުހަނު ގިނަގުނައެވެ. ރޯދައިގެ ސަބަބުން ހަށިގަނޑުގައި ހުންނަ ނުރަނގަޅު މާއްދާތައް ބޭރުކޮށްލައި އެންމެ ފުރިހަމަ ހަކަތައިގައި ހަށިގަނޑު މަސައްކަތްކުރަމުންދެއެވެ. ރޯދައިން ލިއްބައިދޭ ރޫޙާނީ ފައިދާގެ ވާހަކަ އަހަރުމެންނަށް ވަރަށް ގިނައިން ދެކެވެއެވެ. އެހެންކަމުން، ރޯދައިން މީހާ އަށް ލިއްބައިދޭ ނަފްސާނީ ފައިދާގެ ވާހަކަ ދައްކާލަމާ ހިނގާށެވެ.
ހަޤީޤަތަކީ ރޯދަމަހާއި އެކު ބަދަލުވެގެން އަންނަނީ އަހަރުމެން ކެއުމަށް ކަނޑައެޅިފައިވާ ވަގުތުތައް އެކަނިނޫންކަމެވެ. ރޯދަމަހަށް ތައްޔާރުވުމުގަ އާއި ރޯދަ ހިފުމުގެ ތެރޭގައި އާދައިގެ ދިރިއުޅުމުގެ ވަރަށް ގިނަ އާދަތައްވެސް އަހަރުމެން ދޫކޮށްލަމުއެވެ. އާންމު ދިރިއުޅުމުގައި އަހަރުމެން މާބޮޑު ސަމާލުކަމެއް ނުދެވޭ ގޯސްއާދަތައް އަހަރުމެން ހުއްޓާލަމުއެވެ. މިފަދަ ބަދަލުތަކުގެ ސަބަބުން އަހަރުމެންގެ ހަށިގަނޑުގައި ހުންނަ ނޭދެވޭ މާއްދާތައް ފިލައިގެން ދާފަދައިން އަހަރުމެންގެ ސިކުނޑިއާއި ހިތްތަކުގައިވާ ނުތަނަވަސްކަންވެސް ފިލައިދަނީއެވެ. އަޅުކަމުގައި ޝާމިލުވެ އުޅެވޭއިރު ރޫޙާނީ ހިތްހަމަޖެހުންލިބި، ރޯދަމަހުގެ ޚާއްސަ އާއިލީ ހަވީރުތަކުން ދޭދޭ ގުޅުންތައް ވަރުގަދަވެ، ތަރާވީސްތަކުން އަހަރުމެންގެ ހިތްތައް ހަމަޖެހިލަނީއެވެ.
ކެއުމަށް ގެނެވިގެންދާ ބަދަލުތަކުގެ ރޯލުވެސް މިކަމުގައި ކުޑައެއްނޫނެވެ. ރޯދަވެރިޔާ ހާރުކެއުމަށާއި، ރޯދަވީއްލުމަށް ބޭނުންކުރެވެނީވެސް އާންމުކޮށް އަހަރުމެން ކައިއުޅޭ ކެއުންތަކާއި ތަފާތު ކަނާއެވެ. ހަށިގަނޑި ލޮޑުނުވެ މުޅިދުވަސް ހޭދަކުރުމަށް އިޚްތިޔާރުކުރާ ކާނާއިންވެސް އަހަރުމެންގެ ހަށިގަނޑުތައް ހިންދެމިލައެވެ. މިއާއިއެކު ހިތްތިރިކަމާއި، މަޑުމައިތިރިވުމާއި، އަދި މީގެއިތުރުން ޞަދަޤާތް ކުރުމުން އަހަރުމެންނަށް އުފާވެރިކަން ލިބިގެންދެއެވެ.
ނަފްސާނީ ދުޅަހެޔޮކަން ހާސިލްކުރުމުގައި އަހަރުމެންގެ ވަށައިގެންވާ މާހައުލާއި މީހުންގެ ރޯލުވެސް މުހިންމެވެ. ރޯދަމަހާއިއެކު އަހަރުމެން އެސޯސިއޭޓް ކުރަނީ ހާއްސަކަމާއި މުހިއްމުކަމެވެ. ރޯދަމަހުގެ ކޮންމެ ކަމަކީވެސް އަހަރުމެންގެ ހިތްތައް އިންތިޒާރުކުރާ އުފާވެރި ކަންކަމެވެ. ވީމާ ރޯދަމަހުން ލިއްބައިދޭ ނަފްސާނީ ދުޅަހެޔޮކަން ދެމެހެއްޓުމަށް މިމަހުގެ އާދަތައް ދަމަހައްޓަން މަސައްކަތް ކުރަންވީއެވެ. މިމަހުގެ ހިތްގައިމުކަމުގެ ފައިދާނަގައި އަހަރުމެންގެ ނަފްސު ހިސާބުކުރުމަށާއި، ދިރިއުޅުމުގައި ރަނގަޅު އާދަތައް އަށަގެންނެވުމުގެ މަންފާ ލިބިގަންނަންވީއެވެ.
