އޯލެވެލް އިމްތިހާނަށް 10 ދުވަހަށްވެފައިވާއިރު، މިދުވަސްކޮޅަކީ ހުރިހާ ދަރިވަރުންވެސް ހިތްވަރާއިއެކު އިމްތިހާނުގެ އެއްމެފަހު ތައްޔާރީތައްވަމުންދާނެ ދުވަސްކޮޅެވެ. މިފަދަ ދަނޑިވަޅެއްގައި ދަރިވަރުންނަށް ލިބޭ ހުރިހާ ވަގުތެއްގެ ފައިދާ އެއްމެ ބޭނުންތެރި ގޮތުގައި ހިފުމަށްޓަކައި މަސައްކަތްކުރަންވާނެއެވެ. އެގޮތުން، ކެއުމުގައި ރަނގަޅު އާދަތައް ބޭނުންކުރުމާއި ރަނގަޅު ކާނާ ކެއުމަކީ ކޮންމެ ދަރިވަރަކުވެސް ޙާއްސަ ސަމާލުކަމެއް ދޭންވާނެކަމެކެވެ. ތިރީގައި މިވަނީ އިމްތިޙާނުތަކަސް ތައްޔާރުވާ ދަރިވަރުން ކެއުމުގައި ސަމާލުކަން ދޭންވީ 5 ކަމެކެވެ.
1. ގިނައިން ފެންބުއިން
ފެން ހަށިގަނޑުގެ ކެމިކަލް ރިއެކްޝަންތައް އަވަސްކޮށްދީ، މައުލޫމާތު އަވަހަށް ޕްރޮސެސް ކުރުމަށް ސިކުނޑިއަށް މަގުފަހިކޮށްދެއެވެ. ހަށިގަނޑުން ފެން މަދުވާނަމަ، މީހާ ލޮޑުވެ، އަވަހަށް ވަރުބަލިވުމާއިއެކު ހަނދާންނެތޭގޮތް ދިމާވެއެވެ. ދުވާލެއްގެ މައްޗަށް ހަށިގަނޑަށް 1.2ލީޓަރުގެ ފެންބޭނުންވެއެވެ. އެހެންކަމުން، ކޮންމެ ދަރިވަރަކުވެސް ފެން ބުއިމަށް ހަނދާން ބަހައްޓާށެވެ. އަދި ކިޔެވުމަށް އިންނައިރު ކައިރީގައި އަބަދުވެސް ފެން ފުޅިއެއް ބަހައްޓާށެވެ.
2. ކެއުމުގައި ހަކުރު މަދުކުރުން
ކިޔެވުމަށް ގިނަވަގުތުތަކެއް ހޭދަކުރާއިރު ވަރަށް ގިނައިން ފޮނިއެއްޗިހި ކާހިތްވެއެވެ. ނަމަވެސް، މިފަދަ ކާނާއިން ވަގުތުން އެނާރޖީ ބޫސްޓްވީކަމުގައިވިޔަސް، ގިނައިން ހަކުރު ބޭނުންކޮށްފިނަމަ ޝުގަރ ރަޝްވުމާއިއެކު ކުޑައިރުކޮޅެއްގެ ތެރޭގައި ހަށިގަނޑުން ހަކުރުގެ މިންވަރު ދައްވެ، މީހާ ވަރުބަލިކޮށްލައެވެ. އެހެންކަމުން މިފަދަ ދުވަސްވަރެއްގައި ކެއުމުގައި ހަކުރު ގިނަ ނުވާނެހެން ކާތަކެތި އިޙްތިޔާރުކުރުމަށް ސަމާލުކަންދޭންވާނެއެވެ.
3. ސިއްޙަތަށް ފައިދާހުރި ލުއިކާނާ އިޙްތިޔާރުކުރުން
އިމްތިހާނުތަކަށް ތައްޔާރުވާއިރު ލުއިކާނާ ބޭނުންކުރުމަކީ ވަރަށް ގިނަ ދަރިވަރުން ކުރާކަމެކެވެ. ނަމަވެސް، ލުއި ކާނާ އިޙްތިޔާރުކުރުމުގައި ސިއްޙަތަށް ފައިދާހުރި ކާނާއަށް އިސްކަންދޭށެވެ. މީގެތެރޭގައި ބަދަން، ޗީޒްގެ ބާވަތްތައް، ޑްރައިޑް ފުރުޓް، އޯޓްމީލް، ބިސް، އަދި ޔޯގަޓް ފަދަ ތަކެތި ހިމެނެއެވެ. މިކާނާއަކީ ވަރަށް ގިނަ އަދަދަކަށް ޕްރޮޓީން ހިމެނޭ ކާނާ އަށް ވުމާއިއެކު މިފަދަ ކާނާ ބޭނުންކުރުމުން މީހާ ވަރުބަލިނުވެ ގިނަ ވަގުތު ކިޔެވުމުގައި ހޭދަކުރުމަށް އެހީތެރިވެދެއެވެ.
4. ކެފެއިންގެ ބަދަލުގައި ގްރީންޓީ ބޭނުންކުރުން
ގިނަވަގުތު ވަރުބަލިނުވެ ކިޔެވުމަށް ސަމާލުކަންދީގެން އިނުމަށް ވަރަށް ގިނަ ދަރިވަރުން ކެފެއިން ހިމެނޭ ބުއިންތައް ބޭނުންކުރެއެވެ. ނަމަވެސް މިފަދަ ބުއިންތަކުން މިކަމަށް ޙައްލު ލިބިގެންދަނީ ވަރަށް ކުޑަ އިރުކޮޅަކަށެވެ. ކެފެއިން ހިމެނޭ ބުއިންތައް ގިނައިން ބޭނުންކުރާނަމަ، މައިގްރޭން އަދި ފެޓިގްވުން ފަދަ އުނދަގޫތައް ދިމާވެއެވެ. ގްރީންޓީ އަކީ ކެފެއިންގެ ބަދަލުގައި ބުއިމަށް ރަނގަޅު ހަށިގަނޑަށް ފައިދާހުރި އެއްޗެކެވެ. ގްރީންޓީއަކީ އޭގައި ގިނަ އަދަދެއްގެ އެންޓިއޮކްސިޑެންޓްސް ހިމެނޭ އަދި މީހާގެ ސަމާލުކަން ދެމެހެއްޓުމަށް އެހީތެރިވެދޭ ބުއިމެކެވެ.
5. ކެއުމުގައި ފަތްޕިލާވެލި ބޭނުންކުރުން
ތަރުކާރީގެ ތެރޭގައި ހިމެނޭ ބާވަތްތަކުގެ ތެރެއިން ބްރޮކޮލީ، ސްޕިނެޗް، އަދި ކޭލް އަކީ އޭގައި ވަރަށް ދިނަ އަދަދަކަށް ވިޓަމިން އެކުލެވޭ ކާނާއެވެ. މިވިޓަމިންތަކުން ސިކުޑިއަށް އެތައް ފައިދާތަކެއް ކުރުމުގެ އިތުރުން ޤުދުރަތީ ނައިރޭޓްސް އަދި އެންޓިއޮކްސިޑެންޓްސް އުފައްދައިދެއެވެ. މީގެއިތުރުން މި ތަރުކާރީތަކުގައި ގިނަ އަދަދަކަށް B6 އަދި B12 ހިމެނެއެވެ. މިފަދަ ކާނާއިން މީހާ އެލަރޓްވުމަށާއި ހަނދާންގަދަކުރުމަށް އެހީތެރިވެދެއެވެ.
އިމްތިހާނު ދުވަސްވަރު ބަރާބަރަށް ގަޑިން ގަޑިއަށް ކެއުމަށާއި ހަށިގަނޑަށް ގެއްލުންދޭ ލުއިކާނާ އާއި ދުރުވުމަށް ސަމާލުވާށެވެ. ޖިސްމާނީގޮތުންނާއި ނަފްސާނީގޮތުން މީހާ ދުޅަހެޔޮކަންމަތީ ހުރުމަށްޓަކައި ރަންގަޅަށް އަރާމުކޮށް ގަޑިއަށް ނިދަން އާދަކުރާށެވެ. އިމްތިހާނު ހެދުމަށް ސިކުނޑި އެންމެ ފުރިހަމައަށް ތައްޔާރުވުމަށް ކިޔެވުމުގެ އިތުރުން ކެއުމުގައި ރަނގަޅު ކާނާ ހިމަނައި ކަސްރަތު ކުރަންވާނެއެވެ.
ހުރިހާ ދަރިވަރުންނަށްވެސް ކާމިޔާބު އިމްތިޙާނުތަކަކަށް އެދެމެވެ!
