ޑިޒައިން އެންޑް ބިލްޑް އުސޫލުން މ. ދިއްގަރުގައި ހައުސިން ޔުނިޓް އިމާރާތް ކުރުމުގެ މަސައްކަތް މޯލްޑިވްސް ޓްރާންސްޕޯޓް އެންޑް ކޮންޓްރެކްޓިން ކޮމްޕެނީ (އެމްޓީސީސީ) އާ ހަވާލުކޮށްފިއެވެ.
ހައުސިން މިިނިސްޓްރީން އެމްޓީސީސީއަށް ހަވާލުކޮށްފައިވަނީ ދިއްގަރުގައި 75 ހައުސިން ޔުނިޓް ގާއިމު ކުރުމަށެވެ.
މި ޕްރޮޖެކްގެ އަގަކީ 117.9 މިލިއަން ރުފިޔާ އެވެ. އަދި މި މަސައްކަތް ކޮށް ނިންމުމަށް ހަވާލުކުރެވިފައިވަނީ 420 ދުވަހުގެ ތެރޭގައި ނިންމާގޮތަށެވެ.
މި ޕްރޮޖެކްޓްގެ ދަށުން ގާއިމުކުރެވޭ އެޕާޓްމަންޓްގެ ބޮޑުމިކަނީ 1000 އަކަފޫޓެވެ. އަދި އެޕާޓްމަންޓެއްގައި ހިމެނޭނީ 3 ކޮޓަރި، 3 ފާޚާނާ، ސިޓިންރޫމް، ބަދިގެ، ކާގެ، ލޯންޑަރީ އަދި ސްޓޯ ރޫމެވެ.
މީގެއިތުރުން އިމާރާތުގެ ވަށާފާރި، ހައުސިން ޔުނިޓްތަކުގައި ދިރިއުޅޭ ފަރާތްތައް ހިތްފަސޭހަ މާހައުލެއް ގާއިމު ކުރުމަށްޓަކައި އެސަރަހައްދު ވަށައިގެން އަލިކުރެވޭނެ ކަމަށްވެސް ހައުސިން މިނިސްޓްރީން މައުލޫމާތުދެއެވެ. އަދި ޕާކަކާއި ވެހިކަލް ޕާކުކުރާނެ ސަރަހައްދެއްވެސް ގާއިމު ކުރެވޭނެ ކަމަށް މައުލޫމާތު ދީފައިވެއެވެ.
