ފޮތް ކިޔުމަކީ ރީތި އާދައެކެވެ. އަދި މިކަމަކީ ޖިސްމާނީ އަދި ނަފްސާނީ ދުޅަހެޔޮކަމަށް ގިނަ ފައިދާތަކެއް ކޮށްދޭ ކަމެކެވެ. ފޮތް ކިޔުމަކީ ސިކުނޑީގެ ކަނެކްޓިވިޓީ ރަނގަޅުކޮށްދީ ތިބާގެ ބަހާއި ވިސްނުން އިތުރުވެ، މުވާސަލާތީ ހުނަރު ތައް ރަނގަޅުކޮށްދޭ ކަމެކެވެ. ނަމަވެސް ފޮތް ކިޔުމުގެ އާދަ މިހާރު އަހަރުމެންގެ ތެރެއިން ފެންނަނީ ވަރަށް މަދު މީހެއްގެ ފަރާތުންނެވެ. ތިރީގައި މިވަނީ ފޮތް ކިޔާ ހިތްވާ އަދި މިކަން އާދައަކަށް ހަދަން ބޭނުންވާ ފަރާތްތަކަށް ކުރެވިދާނެ 5 ކެމެކެވެ.

1. ކޮންމެ ދުވަހަކު ވެސް ފޮތް ކިޔުމަށް ވަކި ވަގުތެއް ކަނޑައެޅުން
5 ނުވަތަ 10 މިނެޓު ހުސްކޮށްލައިގެން ދުވާލަކު މަދުވެގެން އެއްފަހަރު ފޮތެއް ހުޅުވައިލާށެވެ. ކިޔުމުގެ އާދަ ކޮންމެ ދުވަހަކު ކުރާ ކަމަކަށް ހެދުމަށް ކާއިރު ނުވަތަ ކޮފީއެއް ބޯއިރު ފޮތެއް ކިޔާލާށެވެ. ނިދުމުގެ ކުރިން ފޮތް ކިޔުމަކީ ވެސް ކިޔުމުގެ އާދަ އާލާކުރުމަށް ވަރަށް ރަނގަޅު ކަމެކެވެ. ކޮންމެ ދުވަހަކު ވެސް އެއްވަގުތެއްގައި ފޮތް ކިޔުމަށް ސަމާލުކަންދޭށެވެ. އޭރުން ސިކުނޑި އެ ވަގުތަކީ “ކިޔުމުގެ ވަގުތު” ގެ ގޮތުގައި ބަލައިގަންނަން ފަށައެވެ.

2. ޝައުގުވެރި ފޮތްތައް ކިޔުން
ކިޔަވާ ފޮތަށް މީހާގެ ސިކުނޑި އެންގޭޖް ނުވާނަމަ ކިޔެވުމަކީ މަސައްކަތެއް ހެން އިހުސާސް ކުރެވިދާނެއެވެ. އެކަމަކު ހަގީގަތުގައި ކިޔަވާ އެއްޗެއްގެ ތެރެއަށް ވަދެވޭނަމަ ފޮތް ތިރިކޮށްނުލައި ކިޔެވުމަކީ މަޖާ ކަމަކަށް ވާނެއެވެ. ވީމާ، ކުރިން ކިޔާފައިވާ ފޮތްތަކަށް ނަޒަރު ހިންގާލައި އެންމެ ގަޔާވާ ފޮތްތައް ފާހަގަކޮށް ކިޔުމަށްޓަކައި ޝައުގުވެރިވާ ހެން ހީވާ ފޮތްތައް އިޚްތިޔާރު ކުރާށެވެ.

3. އަބަދުވެސް ފޮތެއް ހިފައިގެން އުޅުން
ފޯނުން ނުވަތަ ކުޑަ އީ-ރީޑަރަކުން ފޮތެއް ހިފައިގެން ދިއުމަކީ މިއަދުގެ ދުނިޔޭގައި ވަރަށް ފަސޭހަ ކަމެކެވެ. ފޮތްތަކުގެ ސައިޒާއި ބަރުދަނަކީ މިހާރު މަގުމަތީގައި ކިޔެވުމަށް އޮތް ހުރަހެއް ނޫނެވެ. ދުވާލު ލިބޭ ކޮންމެ ހުސް ވަގުތެއްގައި ވެސް ކިޔެވޭނެ ގޮތަށް ކޮންމެ ވަގުތަކު ވެސް ފޮތެއް އަތުގައި ބާއްވާށެވެ.

4. ބުކް ކްލަބަކާ ގުޅުން
ގުރޫޕެއްގައި ހިމެނުމުން ފޮތް ކިޔުމަށް ކޮންމެވެސް ވަރެއްގެ ޒިންމާދާރުކަމެއް ލިބިގެންދެއެވެ. ބުކް ކްލަބަކާ ގުޅުމަކީ ފޮތް ކިޔުމުގެ އާދަ އުޖާލާކޮށްލަން ކުރާ ކަމެއް ކަމަށް ވެދާނެއެވެ. ރައްޓެހިންނާއެކު އަމިއްލަ ކްލަބެއް ވެސް ފަށައިގަނެވިދާނެ އެވެ. ކޮންމެ މަހަކު ވެސް ފޮތްތައް ނިންމައި މަޝްވަރާ ކުރުމަށް ކްލަބުން އަޒުމް ކަނޑައެޅުމަކީ މިކަމަށް ބާރުއެޅިދާނެ އަދި ގިނަ ބަޔަކު ޝައުގުވެރިވެދާނެ ކަމެކެވެ.

5. ފޮތް ކިޔުމަށް ހިތްގައިމު ޖާގައެއް ހަދުން
ކިޔުމަށް އެކަށީގެންވާ ތަނެއް ސެޓްކުރުމަކީ މިކަމަށް އިތުރަށް ޝައުގުވެރިވާނެ ކަމެކެވެ. ފޮތް ކިޔުމަށް ކަމުދާނެ ޖާގައެއް ހަދާށެވެ. އެއީ ހިތްހަމަޖެހޭ ގޮނޑީގައި ނުވަތަ ބިންމަތީގައި ހުރި ބާލީސްތަކަކަށް ވެސް ވެދާނެއެވެ. މިގޮތަށް ކިޔުމަށް ވަކިތަނެއް ކަނޑައެޅުމުގައި ބަލަންވީ އަރާމުގައި އިނދެވޭ އަދި ރަނަގަޅު އަލިކަމެއް ހުންނަ ތަނެއް އިހްތިޔާރު ކުރުމަށެވެ.