މިއަހަރު މިހާތަނަށް ރާއްޖެއަށް ހަތްލައްކަ ފަތުރުވެރިން ޒިޔާރަތްކޮށްފިއެވެ.
މި އަހަރުގެ އޭޕްރީލް 17 ގެ ނިޔަލަށް މުޅި ޖުމްލަ 703292 ފަތުރުވެރިން ރާއްޖެ ޒިޔާރަތްކޮށްފައިވާ ކަމަށް ފަތުރުވެރިކަމާބެހޭ ވުޒާރާގެ ތަފާސްހިސާބުތަކުން ދައްކައެވެ.
މިދިޔަ އަހަރުގެ މި މުއްދަތުގައި ރާއްޖެއަށް ޒިޔާރަތްކޮށްފައިވަނީ 616095 ފަތުރުވެރިންނެވެ. މިއީ މިދިޔަ އަހަރާއި އަޅާ ބަލާއިރު 14.2 އިންސައްތަ އިތުރު އަދަދެކެވެ.
މިމަހު މިހާތަނަށް 99288 ފަތުރުވެރިން ރާއްޖެ އައިސްފައިވާއިރު، މިދިޔަ މަހު ރާއްޖެއަށް ޒިޔާރަތްކުރި ފަތުރުވެރިންގެ އަދަދު ވަނީ 194227 އަށް އަރައިފައެވެ.
ތަފާސްހިސާބުތައް ދައްކާގޮތުގައި ރާއްޖެއަށް މިހާރު އެވްރެޖްކޮށް ކޮންމެ ދުވަހަކު 5840 ފަތުރުވެރިން ޒިޔާރަތްކޮށް އަދި އެވްރެޖް 7 ދުވަހުގެ ޗުއްޓީއެއް ހޭދަަކުރެއެވެ.
ރާއްޖެއަށް މިހާރު އެންމެ ގިނަ ފަތުރުވެރިން އަންނަ ގައުމަކީ ޗައިނާއެވެ. ދެވަނައިގައި އިނގިރޭސިވިލާތް އޮތްއިރު، ތިން ވަނައިގައި އޮތީ ރަޝިޔާއެވެ. ސަރުކާރުގެ އަމާޒަކީ 2.3 މިލިއަން ފަތުރުވެރިން މި އަހަރު ރާއްޖެ ގެނައުމެވެ.
