މީގެ ފަހުން ރާއްޖެއިން ބޭރަށް ޑޮލަރު ގެންދެވޭނީ 10000 ޑޮލަރަށް ވުރެ އިތުރުވާ ނަމަ އެ ފައިސާ ހޯދި ގޮތެއް ހާމަކޮށްދިނުމަށްފަހު ކަމަށް ހޯމް މިނިސްޓަރު އަލީ އިހުސާން ވިދާޅުވެއްޖެއެވެ.
އިހުސާން މިހެން ވިދާޅުވެފައިވަނީ އިއްޔެ ބޭއްވި ނޫސްވެރިންގެ ބައްދަލުވުމެއްގައެވެ. މި ބައްދަލުވުމުގައި ބައިވެރިވީ ހޯމް މިނިސްޓްރީއާއި އެ އިދާރާގެ ދަށުން ހިންގާ އެހެން އިދާރާތަކެވެ. އިހުސާން ވިދާޅުވި ގޮތުގައި މިހާރު ވަނީ ކޭޝް ޑިކްލަރޭޝަން ގަވައިދަށް ބޮޑެތި ބަދަލުތަކެއް ގެނެވިފައެވެ. އެގޮތުން 10000 އަށް ވުރެ ބޮޑު އަދަދަކަށް ރާއްޖެއިން ބޭރަށް ފައިސާ ގެންދެވޭނީ އެ ފައިސާ ހޯދި ގޮތެއް ސާބިތުކޮށްދީފައެވެ.
އިހުސާން އިތުރަށް ވިދާޅުވީ ރާއްޖެއަށް ލޭބަރެއްގެ ގޮތުގައި އެތެރެވާ ބައެއް ބިދޭސީން ހަފްތާއެއްގެ ތެރޭގައި އެތައް ލައްކަ ޑޮލަރު ހިފައިގެން ރާއްޖެއިން ފުރައިގެންދާކަން ފާހަގަވެފައި އެބަހުރިކަމެވެ. އެހެންނަމަވެސް މީގެ ފަހުން ބީދޭސީންނަށް ވެސް އަދި ދިވެހިންނަށް ވެސް 10000 ޑޮލަރަށް ވުރެ އިތުރަށް ގެންދާނަމަ، ބޭރަށް ދެވޭނީ ކޮންތާކުން ކިހިނެއް ހޯދި އެއްޗެއްތޯ ބުނެދިނުމަށް ފަހު، ގާނޫނީ އިމުގެ ތެރެއިން ބަލާއިރު ހަމަޖެހޭ ވާހަކައެއްތޯ އެ މީހަކު ދައްކަނީ ކަށަވަރު ކުރެވި، ޑިކްލަރޭޝަން ނިމުނީމައެވެ.
2015 ވަނަ އަހަރުން ފެށިގެން އަމަލު ކުރަމުން އަންނަ ރާއްޖެއަށް އެތެރެ ކުރާ ނުވަތަ ބޭރު ކުރާ ނަގުދު ފައިސާ ރިޕޯޓް ކުރުމުގެ ގަވައިދު އޮތް ގޮތުން ގަވައިދާ ހިލާފަށް ފައިސާ ބޭރު ކުރާ ފަރާތްތަކާ މެދު ފިޔަވަޅެއް ނޭޅެއެވެ. މި ކަން ފާހަގަކުރައްވާ ކަސްޓަމްސްގެ ޑެޕިއުޓީ ކޮމިޝަނާ ޖެނަރަލް އިބްރާހިމް މަފާޒު ވިދާޅުވީ ކަސްޓަމްސްއަށް އޮޅުވާލައިގެން ނުވަތަ ފޮރުވައިގެން ގިނަ އަދަދެއްގެ ފައިސާ ބޭރު ކުރަން އުޅޭ މައްސަލަތަކުގައި ފުލުހުން މެދުވެރިކޮށް ޖިނާއީ ތަހުގީގެއް ހިންގައި ދައުވާ ކުރެވުނު ނަމަވެސް މިހާތަނަށް އައި އިރު އިޖުރާއީ މައްސަލަތައް ބޮޑުވެ ގިނަ މައްސަލަތައް ސާބިތު ނުވުމުގެ ސަބަބުން އެ ފައިސާ އަނބުރާ ދޭން ޖެހޭ ކަމަށެވެ.
