ކުނި މެނޭޖުކުރުމުގެ ގާނޫނުގެ ދަށުން ޕްލާސްޓިކް ކޮތަޅުން ނެގަން ފެށި ފީން ދައުލަތަށް އެއް އަހަރު ދުވަހުގެ ތެރޭގައި 6 މިލިޔަން ރުފިޔާ ލިބިއްޖެއެވެ.
މޯލްޑިވްސް އިންލަންޑް ރެވެނިއު އޮތޯރިޓީ (މީރާ) އިން އާންމުކުރި ތަފާސް ހިސާބުތައް ދައްކާގޮތުން، ޕްލާސްޓިކް ކޮތަޅު ފީއިން މިދިޔަ އަހަރުގެ އޭޕްރިލް މަހުން ފެށިގެން ދައުލަތަށް 12.6 މިލިއަން ރުފިޔާ ވަނީ ލިބިފައެވެ.
އޭގެ އިތުރުން މި އަހަރުގެ ފުރަތަމަ ހަތަރު މަސް ދުވަހުގެ ތެރޭގައި އެކަނިވެސް ޕްލާސްޓިކް ކޮތަޅު ފީއިން ދައުލަތަށް ހަތަރު މިލިއަން ރުފިޔާ ވަނީ ލިބިފައެވެ.
ކުނި މެނޭޖުކުރުމުގެ ގާނޫނުގައި ބުނެފައިވާ ގޮތުން، ވިޔަފާރި ހަރަކާތަކުން ޕޮއިންޓް އޮފް ސޭލްގައި ކަސްޓަމަރަށް ވިއްކާ ނުވަތަ ފޯރުކޮށްދޭ ކޮންމެ ޕްލާސްޓިކް ކޮތަޅަކަށް، އެ ވިޔަފާރި ހަރަކާތުން ޕްލާސްޓިކް ކޮތަޅުގެ ފީގެ ގޮތުގައި އެ ކަސްޓަމަރުގެ އަތުން ދެ ރުފިޔާ ނަގަން ޖެހޭނެއެވެ.
ބައެއް ހާލަތްތަކުގައި އަގު ނެގުން އިސްތިސްނާވަނީ ބަންދުނުކޮށް ހުންނަ ތާޒާ މަސް އަޅާ ކޮތަޅާއި ޑިއުޓީ ފްރީން ވިއްކާ ކޮތަޅުގެ އިތުރުން ކުނީގެ ހިދުމަތްދޭ ތަންތަނުން ވިއްކާ ކަޅު ކޮތަޅެވެ.
ޑިއުޓީ ފްރީއިން ވިއްކާ ތަކެތި އަޅާ ކޮތަޅުން ފީއެއް ނުނެގިނަމަވެސް، ހަނޑޫ، ހަކުރު އަދި ފުށް އަޅާ ކޮތަޅުން ދައުލަތަށް ޓެކްސް އަންނަނީ ނަގަމުންނެވެ. މޭވާއާއި ތަރުކާރީ އަޅާ ކޮތަޅުން ވެސް ދައުލަތަށް ޓެކްސް ނަގާނެއެވެ.
