ރާއްޖެއަށް މިހާރު ކުރަމުންދާ ހުޅަނގު މޫސުމުގެ ވިއްސާރަ އިތުރަށް ގަދަވެ ރާއްޖޭގެ މޫސުން ގޯސްވާނެކަމަށް ލަފާކޮށް ބ އަތޮޅުން ފެށިގެން އައްޑު އަތޮޅާއި ދެމެދުގެ ސަރަހައްދުތަކަށް މޫސުމާ ބެހޭ ގައުމީ އިދާރާއިން ރީނދޫ ސަމާލު ނެރެފިއެވެ.
މޫސުން ގޯސްވުމުގެ ސަބަބުން ރޭގެ 20:00އިން 12:00ގެ ނިޔަލަށްވެސް މި ސަރަހައްދަށް ރީނދޫ ސަމާލުނެރެފައިވާއިރު އަނެއްކާވެސް އެ އިދާރާއިން ވަނީ، ބ. އަތޮޅުން އައްޑު އަތޮޅަށް ރީނދޫ ސަމާލު ނެރެފައެވެ.
އެއީ މިއަދު ހެނދުނު 10:00އިން ފެށިގެން މެންދުރު 14:00އާ ހަމަށެވެ.
https://x.com/MetMaldives/status/1791688710578479309
މޫސުމާއި ބެހޭ ޤައުމީ އިދާރާއިން ބުނީ. މި ވަގުތުތަކުގައި ގަޑިއަކު 25 މޭލާއި 30 މޭލާ ދެމެދުގެ ބާރުމިނުގައި ވައި ޖެހި ވިލާގަނޑުގައި ގަޑިއަކު 50 މޭލަށް ވައި ގަދަވެ ކަނޑުތައް ވަރަށް ގަދަވާނެ ކަމަށް ލަފާކުރެވޭ ކަމަށެވެ.
މީގެ އިތުރުން މޫސުމާ ބެހޭ ޤައުމީ އިދާރާއިން ވަނީ މުޅި ރާއްޖެއަށް ވިއްސާރަކޮށް ވައި ގަދަވާނެ ކަމަށް ލަފާކޮށް މުޅި ރާއްޖެއަށް ހުދު ސަމާލު ވެސް ނެރެފައެވެ. އެގޮތުން ހުދު ސަމާލު ނެރެފައި ވަނީ މިއަދު ހެނދުނު 06:00އިން ފެށިގެން މެންދުރު 12:00އާ ހަމައަށެވެ.
މި ދުވަސްވަރު ކުރާ ވިއްސާރައާ ގުޅިގެން ކަނޑުތައް ގަދަވުމުގެ ސަބަބުން މޫސުމާ ބެހޭ އިދާރާއިން ވަނީ ކަނޑުދަތުރުކުރާ ފަރާތްތަކުން މޫސުމަށް ސަމާލުވާން އިލްތިމާސްކޮށްފައެވެ.
