ލޭގައި ހަކުރު ހުންނަ މިންވަރު މެނޭޖްކުރުމަކީ ދުޅަހެޔޮ ސިއްހަތެއްގައި ހުރުމަށް ކޮންމެ މީހަކަށްވެސް މުހިންމު ކަމެކެވެ. ބްލަޑް ގުލްކޯޒަކީ އަހަރެމެން ކާ ކާނާއިން ހަކަތަ އުފެއްދުމަށާއި އަހަރެމެންގެ ގުނަވަންތަކާއި މަސްތަކާއި ނާރުތަކުގެ ނިޒާމަށް އެހިތެރިވާ އެއްޗެކެވެ. ގުލްކޯޒް އަހަރެމެންގެ ހަސިގަނޑުގައި ހުންނަންޖެހެނީ މިމަސައްކަތްތައް ކުރެވޭ މިންވަރަށެވެ. މިކަމަށް ބޭނުންވާ ވަރަށްވުރެ ދަށްވާނަމަ އަދި މަތިވާ ނަމަވެސް މިމަސައްކަތްތަކަށް ބުރޫ އަރައެވެ.
ބުލަޑް ގުލްކޯޒްގެ ވާހަކަ ދައްކާއިރު އެންމެ ގިނައިން އަހަރެމެންނަށް އަޑުއިވޭނީ ހަކުރު ބައްޔާއި ހަކުރު ބަލި ހުންނަ މީހުންގެ ވާހަކައެވެ. މިލިޔުމުގައި މިބަލާލަނީ ލޭގައި ހަކުރު ހުންނަ މިންވަރު މެނޭޖްކުރުމަށް މަސައްކަތްކުރާއިރު ހެދޭ ބައެއް ގޯސްތަކާއި އެކަންކަން ރަނގަޅު ކުރުމަށް ކުރެވިދާނެ ބައެއް ކަންކަމަށެވެ.
1. ކެއުމުގައި ހިމެނޭ ކެލޮރީސް އަށް އެކަނި ފޯކަސްކުރުން
ފޯކަސް ކުރެވެނީ ކެއުމުގައި ކިހާވަރަކަށް ކެލޮރީސް ހިމެނޭތޯ އެކަނި ކަމުގައިވާނަމަ، މިއީ ގޯސްކޮށް ކުރެވޭ ކަމެކެވެ. މުހިންމީ ޕްރޮޓީން އާއި ފެޓްސް އަދި ކާބޯހައިޑްރޭޓްސް ބެލެންސްކޮށް ހިމެނޭ ގޮތަށް ކެއުމުގެ އާދަތައް ހިފެހެއްޓުމެވެ. މިއިން ކޮންމެ މާއްދާއަކީވެސް ލޭގައި ހަކުރު ހިމެނޭ މިންވަރަށް އަސަރުކުރާނެ އަދި ހަށިގަނޑަށް ބޭނުންވާ މާއްދާތަކެވެ.
2. ޕްރޮޓީން އިތުރަށް ނެގުން
ކެއުމުގެ އިރުކޮޅެއްފަހުން އަނެއްކާވެސް ބަނޑުހައިކަން އިހްސާސް ކުރެވޭނަމަ، އެއީ ހަށިގަނޑަށް ބޭނުންވާވަރަށް ޕްރޮޓީން ނުލިބޭކަމުގެ އަލާމާތަކަށް ވެދާނެއެވެ. ޕްރޮޓީން އަކީ ލޭގައި ހަކުރު ހުންނަ މިންވަރު އިތުރުވިޔަނުދީ ހިފަހައްޓާ މާއްދާއެކެވެ. އަދި ކާނާ ހަޖަމް ކުރުމުގެ ސްޕީޑްވެސް ޕްރޮޓީން އިން ލަސްކޮށްދެއެވެ.
3. ބޭނުންވާ ވަރަށް ފައިބަރ އެކުލެވޭ ކާނާ ނުކެއުން
ހަށިގަނޑަށް ކޮންމެ ދުވަހަކު ބޭނުންވާ މިންވަރަށް ފައިބަރ ނުލިބުމަކީ، ތިމާ ކާ ކާނާގައި ހިމެނޭ މާއްދާތައް ހަށިގަނޑަށް ނަގައި ނުގަންނަން ދިމާވާ ސަބަބަކަށް ވެދާނެއެވެ. ފައިބަރ އަކީ ހަށިގަނޑަށް ލިބޭ ކާނާއިން ހަކުރު އެބްސަރބްކޮށް ލޭގެތެރެއަށް އެމާއްދާތަށް ނަގައިގަންނަން އެހީތެރިވާ މާއްދާއެކެވެ.
4. ކަސްރަތު ނުކުރުން
ލޭގައި ހަކުރު ހުންނަ މިންވަރު މެނޭޖްކުރުމަށްޓަކައި ކަސްރަތު ކުރުމަކީ ކޮންމެހެން މުހިންމު ކަމެކެވެ. އެންޑޯކްރޮނޮލިގިސްޓް، ޑޜ. ރީޝިއޯ ސޭލްސް ވޭލަން ވިދާޅުވަނީ ކަސްރަތު ކުރުމުން ހަށިގަނޑުގެ އިންސިއުލިން ސެންސިޓިވިޓީ ދަށްވެ ލޭގައި ހުންނަ ހަކުރުގެ މާއްދާތަށް މަސްތަކާއި ސެލްތަކަށް ދާނެކަމަށެވެ. މިކަމުގެ ސަބަބުން ހަށިގަނޑުގައި ހުންނަ ގުލްކޯޒްގެ މިންވަރު ދަށްކުރުމަށް އެހީތެރިވެއެވެ.
5. ސްޓްރެސް މެނޭޖްނުވުން
ހަށިގަނޑުގެ ގުލްކޮޒް ލެވެލް ވަރަށް ބޮޑަށް ހަށިގަނޑުގެ ހޯމޯން ބެލެންސަށް ބަރޯސާވެއެވެ. މީހާ ސްޓްރެސްވެފައި ހުރުން ނުވަތަ ގިނައިން ސްޓްރެސް ވާނަމަ، ސްޓްރެސް ހޯމޯންތައް އިތުރުވެ ބްލަޑް ގުލްކޯޒް އިތުރުވުމަށް މަގުފަހިވެއެވެ.
ލޭގައި ގުލްކޯޒް ނުވަތަ ހަކުރު ހުންނަ މިންވަރު މެނޭޖް ކުރުމަށް ކެއުމަށާއި އެހެނިހެން ދިރިއުޅުމުގެ އާދަތަކަށްވެސް ރަނގަޅު ބަދަލުތައް ގެންނަންޖެހެއެވެ. އެގޮތުން ހަށިގަނޑަށް ބޭނުންވާ ފައިދާހުރު މާއްދާތަށް އެކުލެވޭ ކާނާ ކެއުމާއި އެކު ކަސްރަތު ކުރުމާއި ރަނގަޅަށް ނިދުން އަދި މީހާގެ ނަފްސާނީ ދުޅަހެޔޮކަމަށް ސަމާލުކަން ދިނުމަކީ ވެސް މުހިންމު ކަންކަމެވެ.
