އާރްޓީއެލް ޓާމިނަލްތައް ލޯކަލް ގަވަމަންޓް މިނިސްޓްރީއާ ތިން ހަފްތާ ތެރޭގައި ހަވާލުކުރާނެ ކަމަށް ޓްރާންސްޕޯޓް މިނިސްޓަރު މުޙައްމަދު އަމީން ވިދާޅުވެއްޖެއެވެ.
އިއްޔެ ބޭއްވި ނޫސްވެރިންގެ ބައްދަލުވުމުގައި ވާހަކަފުޅު ދައްކަވަމުން މިނިސްޓަރު އަމީން ވިދާޅުވީ އާރްޓީއެލްގެ ހިދުމަތް ދިނުމަށްޓަކައި ހަ އޮތޮޅެއްގައި ޓާމިނަލްތަކެއް އެޅިފައިވާ ކަމަށެވެ. އަދި އެމްޓީސީސީ އާއި ހަވާލުކޮށްގެން ޓާމިނަލްތައް ހިނގަމުން ގޮސްފައިވާއިރު، ޓާމިނަލްތައް ހިނގުމަށް ކަނޑައެޅިފައިވާ ހުރި އަގުތަކުގެ މައްސަލަ ނުނިމި ގިނަ ދުވަސްވެފައިވާ ކަމަށާއި ބައެއް ޓާމިނަލްތައް ބޭނުން ނުކުރެވުމުގެ ސަބަބުން ހަލާކުވާ ހިސާބަށް ގޮސްފައިވާ ކަމަށެވެ.
އާރްޓީއެލް ސްޓެއަރިން ކޮމިޓީއިން 21 ޓާމިނަލެއް ކައުންސިލްތަކާ ހަވާލުކުރަން މިދިޔަ ހަފްތާގައި ނިންމާފައިވީ ނަމަވެސް އެ ޓާމިނަލްތައް ހަވާލުކުރަން ނިންމާފައިވަނީ ލޯކަލް ގަވަމަންޓް މިނިސްޓްރީއާ ކަމަށެވެ. އަދި އެމިނިސްޓްރީ އާއި ހަވާލުކުރުމަށްފަހު، އެ މިނިސްޓްރީއިން ކަނޑައަޅާ އުސޫލެއްގެ މަތީން ކައުންސިލްތަކާއި ހަވާލުކުރާނެ ކަމަށް މިނިސްޓަރު އަމީން ވިދާޅުވިއެވެ.
މީގެ އިތުރުން ކައުންސިލްތަކުން ޓާމިނަލްތައް ހިންގައިގެން ކޮންމެވެސް ވަރެއްގެ ނަފާއެއް ލިބޭނެ ފަދައިން 21 ޓާމިނަލްއެއް ކުރިއަށް އޮތް ތިން ހަފްތާގެ ތެރޭގައި ކައުންސިލްތަކާ ހަވާލު ކުރެވޭނެ ކަމަށްވެސް އިއްޔެ ބޭއްވުނު ބައްދަލުވުމުގައި މިނިސްޓަރު ވިދާޅުވިއެވެ.
