ލޯންޗަކުންޖެހި ފާނަ މަސްވެރިކަން ކުރަން އުޅުން މީހަކު މަރުވެ، ލޯންޗު ދުއްވަން އިން ކައްޕަ ފުލުހުން ވަނީ ހައްޔަރުކޮށްފިއެވެ.
މި ހާދިސާގައި މަރުވެފައިވާ ބިދޭސީ މީހާއަކީ ފ. ފިއަލީ “ޓްވިންސް” ދޯނީގައި މަސްވެރިކަމަށް ފައިބާ އުޅުން މީހެއް ކަމަށާއި އޭނާގައިގައި ޖެހުނު ލޯންޗް ދުއްވަން އިނީ ދިވެއްސެ ކަމަށާއި އޭނާ މިހާރު ވަނީ ހައްޔަރު ކޮށްފައިކަމަށް ފުލުހުން ބުނެފައިވެއެވެ.
ދަ ޕްރެސް އިން މިއަދު ފީއަލީ ކައުންސިލްގެ ރައީސް މޫސާ އަޙުމަދު އާއި ހަވާލާދީ ރިޕޯޓް ކޮށްފައިވާ ގޮތުގައި މިހާދިސާ ހިނގާފައިވަނީ މިއަދު ހެނދުނު ގާތްގަނޑަކަށް 7:30 ހާއިރު ކަމަށާއި އޭނާގެ ގައިގައި ލޯންޗުން ޖެހިފައިވަނީ އދ. ދަނގެތީ ކައިރީގައި ފާނަ މަސްވެރިކަން ކުރަން ފައިބާ އުޅުމުގެ ތެރޭގައެވެ.
ފުލުހުން ބުނެފައިވާ ގޮތުގައި ހެނދުނު ގަޑީން 7:55 ހާއިރު، އދ. ދަނގެތީ ކައިރިއަށް ފާނަ މަސްވެރިކަން ކުރަން ފައިބާ އުޅުން މީހެއްގެ ގައިގައި މާލެ ދަތުރު ކުރަމުން ދިޔަ ލޯންޗަކުން ޖެހިފައިވާކަން ރިޕޯޓްކޮށްފައިވާ ކަމަށާއި އޭނާ އެތަނުން ދަނގެތީ ސިއްޙީ މަރުކަޒަށް ގެންދެވުނު ކަމަށާއި އޭރުވެސް އޭނާ އޮތީ މަރުވެފައި ކަމަށެވެ.
މި ހަދިސާ މިހާރު ތަޙުގީގު ކުރާކަމަށް ފުލުހުން އިތުރަށް ބުނެފައިވެއެވެ.
