އިޒްރޭލުގެ ޕާސްޕޯޓުގައި ރާއްޖެ އެތެރެވުން މަނާ ކުރަން ގަލޮޅު ދެކުނު ދާއިރާގެ މެމްބަރު މީކާއިލް އަޙްމަދު ނަސީމް ރައްޔިތުންގެ މަޖިލީހަށް ހުށަހެޅުއްވި ބިލްގެ ފުރަތަމަ ކިޔުން މިއަދުގެ ރައްޔިތުންގެ މަޖިލީހުގެ ޖަލްސާއަށް ތާވަލު ކޮށްފިއެވެ.
މި ބިލުގެ ފުރަތަމަ ކިޔުން މިއަދުގެ ޖަލްސާގައި އިއްވުމަށް ފަހު މާދަމާ ބަހުސް ފެށުމަށް ނިންމާފައިވާކަމަށް މައުލޫމާތުލިބެއެވެ.
ފަލަސްތީނުގެ ރައްޔިތުންނާ ދެކޮޅަށް އިޒްރޭލުން ހިންގާ ޖަރީމާތަކާ ގުޅިގެން އިޒްރޭލުގެ ޕާސްޕޯޓުގައި ރާއްޖެ އެތެރެވުން މަނާ ކުރާ ޤަރާރެއް އެކުލަވާލުމަށް މީކާއިލް އިމިގްރޭޝަނަށް ހުށަހެޅުއްވީ މޭ މަހުގެ 30 ވަނަ ދުވަހުއެވެ. މީކާއިލް ހާމަކުރި ގޮތުގައި އިސްރާއީލުން ފަލަސްތީނުގެ ދަރިފަސްކޮޅު ނައްތާލުމަށް ހިންގަމުންދާ ގަތުލުއާންމާ ދެކޮޅަށް ރާއްޖެއިން ފިޔަވަޅުތަކެއް އެޅުމުގެ ގޮތުން، ރާއްޖެއަށް އިސްރާއީލުގެ ރައްޔިތުން އެތެރެވުން މަނާކުރަން ޖެހެއެވެ. މީގެ އިތުރުން މީކާއިލްގެ އިސްލާހުގައި ވަނީ އިޒްރޭލުގެ ޕާސްޕޯޓުގެ އިތުރުން އެހެން ގައުމެއްގެ ޕާސްޕޯޓެއް އޮތަސް އިޒްރޭލު ޕާސްޕޯޓެއް އޮތް ނަމަ ރާއްޖެ އެތެރެވުމުގެ ހުއްދަ ނެތް މީހެއްގެ ގޮތުގައި ކަނޑައަޅަން ހުށަހަޅުއްވައިފައެވެ.
އިސްރާއީލްގެ ޕާސްޕޯޓުގައި ރާއްޖެ އެތެރެވުން މަނާ ކުރަން ވަޒީރުންގެ މަޖިލީހުގެ ރުހުމާ އެކު ރައީސް ޑރ. މުޙައްމަދު މުޢިއްޒު ވަނީ މިދިޔަ އާދީއްތަ ދުވަހު ނިންމަވާފައެވެ.
މީކާއިލްގެ އިސްލާހު މަޖިލިހަށް ވައްދާފައި ވަނިކޮށް، ސަރުކާރުން އާ އިސްލާހެއް ހުށަހަޅަން ނިންމުމުން އިދިކޮޅު އެމްޑީޕީގެ ޕާލަމެންޓްރީ ގުރޫޕުން އިއްޔެ ވަނީ ކަންބޮޑުވުން ފާޅުކޮށް ނޫސްވެރިންނާ ބައްދަލުކުރައްވާފައެވެ. މި ބައްދަލުވުމުގައި މީކާއިލް ވިދާޅުވީ ގާނޫނަށް އިސްލާހުތަކެއް ގެނައުމަށް ސަރުކާރުން މަޖިލީހަށް ފޮނުވަން ނިންމާފައިވާކަމަށް މައުލޫމާތު ލިބިފައިވާކަމަށެވެ. އަދި މިހާރު ވެސް މި ކަމާ ގުޅޭ ބިލެއް ރައްޔިތުންގެ މަޖިލީހުގައި އޮއްވައި އިތުރު ބިލެއް ހުށަހަޅަން ސަރުކާރުން ނިންމުމުގެ ސަބަބުން މި މަސައްކަތް ދިގުލައިގެންދާތީ މަރުޚަބާ ދެއްނެވެން ނެތްކަމަށާއި އެ ކަމާ ކަންބޮޑުވުން ފާޅުކުރައްވާކަމަށް މީކާއިލް ވިދާޅުވިއެވެ.
މީކާއިލް މިހެން ވިދާޅުވުމާ ގުޅިގެން ނިމިދިޔަ އެމްޑީޕީގެ ސަރުކާރުގައި ރައްޔިތުންގެ މަޖިލީހުގައި އެމްޑީޕީގެ މެޖޯރިޓީ އޮވެ، އެމްޑީޕީން މި ކަން ކޮށްފައި ނުވާތީ އާންމުން ދަނީ ފާޑުކިޔުން އަމާޒުކުރަމުންނެވެ.
