މި އަހަރަކީ ޙައްޖު ކޯޕަރޭޝަންގެ ތާރީޚުގައިވެސް އެންމެ ގިނަ ޙައްޖާޖީން ޙައްޖަށް ގެންދިޔަ އަހަރު ކަމަށާއި މާތް ﷲ ގެ ރަޙުމަތްފުޅުން ޙައްޖު އޮޕަރޭޝަންގެ ހުރިހާކަމެއްވެސް ވަރަށް ކާމިޔާބު ކަމަށް އިސްލާމީ ކަންތައްތަކާ ބެހޭ ވަޒީރު ޑރ ޝަހީމް އަލީ ސަޢީދު ވިދާޅުވެއްޖެއެވެ.
އެގޮތުން ވަޒީރު ވިދާޅުވީ، ފެންވަރު ރަނގަޅު ދިވެހި ރަހަތައް އެކުލެވޭ ކާނާއި ފެށިގެން ބަލި މީހުންނަށް ފޯރުކޮށްދޭން ޖެހޭ އެހީތެރިކަމާއި ހަމައަށް ހުރިހާ ޚިދުމަތެއްވެސް އެންމެ ފެންވަރު ރަނގަޅުކޮށް ފޯރުކޮށްދެވުން ކަމުގައި ވަޒީރު ވަނީ ވިދާޅުވެފައެވެ.
އޭގެ އިތުރުން، ޑައިލެލިސް ހަދާ މީހުންނާއި، ކެންސަރަށް ފަރުވާ ހޯދާ ބައެއް މީހުންނާއި، ހިތުގެ ބަލި ހުންނަ ބައެއް މީހުން ހާޖީންގެ ތެރޭގައި ތިބިއިރު، އެހުރިހާ ފަރާތްތަކަށްވެސް ބޭނުންވާ އެހީތެރިކަމާއި ފަރުވާ އެންމެ ފުރިހަމައަށް ފޯރުކޮށްދެވުން ކަމުގައި ވަޒީރު ވިދާޅުވިއެވެ.
ހަމަ އޭގެ އިތުރުން އެކި ކަންކަމުގައި އެޑްމިޓްކުރެވުނު ފަރާތްތަކަށް މަތީ ދަރަޖައިގައި އެހީ ފޯރުކޮށްދެއްވުނުކަން ފާހަގަ ކުރައްވައި ވަޒީރު ވިދާޅުވީ، ސްމާޓް ޓެގް ގެ ބޭނުންވެސް މި އަހަރު ފުރިހަމައަށް ކުރެވިގެން ދިޔަ ކަމަށާއި މަގު އޮޅުނު 100 އެއްހާ ހާޖީން ސްމާޓް ޓެގް ޑިވައިސްގެ އެހީގައި ހުރި ތަނެއް ބަލައިގެން ހޯދި ކަމަށާއި ޢަރަފާތަށް ނުވަދެވޭ އެއްވެސް ޙާޖީއެއް ނެތް ކަމުގައި ވަޒީރު ވިދާޅުވިއެވެ.
ފުރޮޅުލީ ގޮނޑީގައި ގިނަ އަދަދެއްގެ ހާޖީން އުޅުނުއިރު އެންމެނަށް އެހީތެރިކަން ދިންކަން ފާހަގަކުރައްވައި ވަޒީރު ވިދާޅުވީ، އަރަފާތުގެ ފޭލިގޭގެ އިންތިޒާމްތައް ފުރިހަމަ ހަމަޖެއްސިފައި ވާނެކަމަށެވެ.
މީގެ އިތުރުން މިނާގައި ގާއިމްކުރެވުނު ފޭލިގޭތަކުގައި ތާށިކަމެއް ހުރި ނަމަވެސް އެކަން މެދުވެރިވި ސަބަބުތައް ބަލައި ކުރިއަށް އޮތްތަނުގައި ރަނގަޅުކުރަން އަޅަންޖެހޭ ފިޔަވަޅުތައް އަޅުއްވާނެ ކަމަށް ވަޒީރު ވިދާޅުވިއެވެ.
އަދިވެސް ވަޒީރު ވިދާޅުވީ، ހައްޖު ކޯޕަރޭޝަންގެ މެނޭޖްމަންޓާއި މުރާލި މުވައްޒަފުންނާއި ހިއްވަރުގަދަ އެހީތެރިންނަށް ޙައްޤު ޝުކުރު ރައްދު ކުރާކަމަށާއި، ޙައްޖު މިޝަންއަށްވެސް ޝުކުރު އަދާކުރައްވާ ކަމަށެވެ.
އަދި ޙާޖީންގެ ކަންކަމުގައި އެހީތެރިވެދިން މަދީނާގެ ކިޔަވާ ކުދިންނާއި ޚާއްޞަކޮށް ބޮޑު ކައްކާ ވަހީދުބޭގެ އިތުރުން ޑރ. އާދަމް ޝަމީމާއި އިލްމުވެރި އެންމެހައި މުރުޝިދުންނަށް ވަޒީރު ވަނީ ޝުކުރު ދަންނަވައިފައެވެ.
ހަމަ އެޔާއެކު ދިވެހި ހާޖީންގެ ކަންކަން ކަވަރު ކުރި މީޑިއާތަކަށާއި އިސްލާމިކް ސްޓޫޑިއޯގެ ޓީމްގެ އިތުރުން ސައޫދީ ސަރުކާރަށާއި ހައްޖު މިނިސްޓްރީއަށްވެސް ވަޒީރުވަނީ ޝުކުރު އަދާކުރައްވައިފައެވެ.
ރަނގަޅުކުރަންޖެހޭ ކަންތައްތަކެއް ފާހަގަކުރެވިފައިވާ ކަމަށާއި އަންނަ އަހަރަށް އެކަންކަން ރަނގަޅު ކުރައްވާނެ ކަމަށް ވެސް ވަޒީރު ވިދާޅުވިއެވެ.
