ރާއްޖޭގައި ކުށް ކުރާ އަދަދު ކުށްލިއަކަށް ގިނަވީ ކުރީގެ ސަރުކާރުން ކުށްވެރިންތަކެއް މުޖުތަމައަށް ދޫކޮށްލުމުންކަމަށް ދޭހަވާ މޭރުމުން ފުލުހުންގެ ހިދުމަތުގެ ތަރުޖަމާނު އަޙްމަދު ޝިފާން ވިދާޅުވުމުން، އެ ވާހަކައަށް އެމްޑީޕީން ރައްދުދީފިއެވެ.
އެމްޑީޕީން ވަނީ ޝިފާންގެ ވާހަކަފުޅަށް ރައްދުދީ އިއްޔެ ބަޔާނެއް ނެރެފައެވެ. އެ ބަޔާނުގައި އެމްޑީޕީން ވަނީ ޝިފާންގެ ވާހަކަފުޅު ކުށްވެރި ކޮށްފައެވެ.
ކުށްކުރުން އިތުރުވެފައިވަނީ މީގެ 10 މަސް ކުރިން ބަންދުން ދޫކޮށްލި ބައެއްގެ ސަބަބުންކަމަށް ފުލުހުންގެ ތަރުޖަމާނު ވިދާޅުވެފައިވަނީ އެ ކަމަށް ބާރުދޭނެ އެއްވެސް ހެއްކެއް، ތަފާސް ހިސާބެއް، ދިރާސާއެއް ނުވަތަ ލިޔެކިޔުމެއް ނެތި ސިޔާސީ މަންފާއެއް ހާސިލު ކުރުމުގެ ބޭނުމުގައިކަމަށް އެ ޕާޓީން ދެކޭކަމަށް އެމްޑީޕީން ބުނެފައިވެއެވެ. އަދި ގާނޫނާ ހަވާލާދީ އެމްޑީޕީން ފާހަގަކުރި ކަމަކީ މާފާއި ޕެރޯލް ދެވޭނީ އަހަރު ދުވަހުގެ ތެރޭގައި ކުށް ނުކުރުމަށް އިގުރާރުވެ ޝަރުތު ކުރުމަށް ފަހު އަދި ކުށެއް ކޮށްފިނަމަ ކުރީގެ ހުކުމް ތަންފީޒު ކުރެވޭ ގޮތަށް ކަނޑައެޅުމަށް ފަހުކަމެވެ.
މީގެ އިތުރުން އެމްޑީޕީން ވަނީ މި ސަރުކާރު ވެރިކަމާ ހަވާލުވުމަށް ފަހު، ނިމިދިޔަ ރައްޔިތުންގެ މަޖިލީހުގެ އިންތިހާބާ ދިމާކޮށް ނުރައްކާތެރި ކުށްވެރިންތަކެއް މިނިވަން ކޮށްފައިވާ ކަމަށް ތުހުމަތު ކޮށްފައެވެ. އަދި އެ ކުށްވެރިން ދޫކޮށްފައިވަނީ ފުރިހަމަ ކުރަން ޖެހޭ އިޖުރާއަތްތައް ފުރިހަމަ ނުކޮށްކަމުގެ ތުހުމަތު އޮތް ކަމަށް ވެސް އެ ޕާޓީން ބުންޏެވެ.
ފުލުހުންގެ ތަފާސް ހިސާބުތަކުން ދައްކާ ގޮތުގައި މިއަހަރުގެ މިހާތަނަށް ވައްކަމާއި ފޭރުމުގެ 1000އަށް ވުރެ ގިނަ މައްސަލަ ވަނީ ހުށަހަޅާފައެވެ. އެގޮތުން ވައްކަމުގެ 1680 މައްސަލަ ހުށަހަޅާފައިވާ އިރު ފޭރުމުގެ 235 މައްސަލަ ހުށަހަޅާފައިވެއެވެ.
