ޗައިނާގެ ޗޮންޗިންގ އެއާލައިންސް އިން ރާއްޖެއަށް ދަތުރުތައް ފަށައިފިއެވެ.
އެގޮތުން މި އެއަރލައިންގެ ފުރަތަމަ ފްލައިޓަށް މަރުހަބާ ކިއުމަށް އިއްޔެ ވެލާނާ އިންޓަރނޭޝަނަލް އެއަރޕޯޓުގައި ވަނީ ޚާއްސަ ރަސްމިޔާތެއް ބާއްވައިފައެވެ.
އިއްޔެ ހަވީރު ކުރިއަށް ދިޔަ މި ރަސްމިޔާތުގައި ވާހަކަފުޅުދައްކަވަމުން، އެމް.އޭ.ސީ.އެލްގެ ސީ.އީ.އޯ އަދި މެނޭޖިންގ ޑިރެކްޓަރ، އިބްރާހީމް ޝަރީފް މުޙައްމަދު ވިދާޅުވީ، އެމް.އޭ.ސީ.އެލްއިން އަބަދުވެސް މަސައްކަތްކުރަނީ ފަތުރުވެރިކަމުގެ ސިނާއަތާއި ދުނިޔެއާއި ގުޅުވާލަދޭ ފާލަމެއްގެ ގޮތުގައި ކަމަށާއި، ފަތުރުވެރިކަމާ ބެހޭ ވުޒާރާއާއި ގުޅިގެން ރާއްޖެއަށް ގިނަ އެއަރލައިންތައް ގެނައުމަށް އެކުންފުނިން އަބަދުވެސް މަސައްކަތްކުރާނެ ކަމަށެވެ.
މީގެ އިތުރުން އެބޭފުޅާގެ ވާހަކަފުޅުގައި ރާއްޖެއާއި ޗައިނާއާއި ދެމެދުގައި އޮތް އެކުވެރިކަމުގެ ގުޅުމަށް އިޝާރަތްކުރައްވާ ވިދާޅުވީ، ޗައިނާގެ މުހިންމު ސިޓީތަކުން ރާއްޖެއަށް ދަތުރުކުރަން ފެށުމަކީ އިޤްތިސާދީ އެކި ދާއިރާތަކުން ރާއްޖެއަށް ކުރިއެރުން އަންނާނެ ކަމެއްކަމަށެވެ.
މީގެ އިތުރުން ރާއްޖެ ޒިޔާރަތްކުރާ ޗައިނާ ފަތުރުވެރިންގެ އަދަދު އިތުރުވެގެން ދާކަން ފާހަގަކޮށް ފަތުރުވެރިކަމުގެ ސިނާއަތުގެ އެކި ފަރާތްތަކުން ގުޅިގެން ކުރާ މަސައްކަތްތަކަށް އިބްރާހީމް ޝަރީފް ވަނީ ޝުކުރު އަދާކުރައްވާފައެވެ.
މިރަސްމިއްޔާތުގައި އެއަރލައިންގެ ވައިސް ޕްރެޒިޑެންޓް، ޝިޔެ ޖިންގޕިންގ ވަނީ މި ދެ މަންޒިލް ގުޅުވާލުމާއެކު، ރާއްޖޭގެ ވިޔަފާރިވެރިންނަށް އެކަމުގެ ހެޔޮ އަސަރުތައް ކުރާނެކަން ފާހަގަ ކުރައްވައިފައެވެ.
އިއްޔެ ރާއްޖެ އައި ޗޮންޗިންގ އެއާލައިންގެ ފުރަތަމަ ދަތުރުކޮށްފައިވަނީ 82 ފަސިންޖަރުންނާއެކު ޗައިނާގެ ޗޮންޗިންގ ސިޓީއިން ސްރީލަންކާގައި ޓްރާންސިޓްކުރުމަށްފަހުއެވެ. ޗޮންޗިންގ އެއަރލައިންގ އިން ރާއްޖެއަށް ހަފުތާއަކު ތިން ދަތުރުކުރުމަށް ހަމަޖެހިފައިވާއިރު، މި ދަތުރުތަކުގައި ބޭނުންކުރާނީ އެއަރބަސް އޭ320 މަރުކާގެ 165 ސީޓުގެ ފްލައިޓެއް ކަމުގައި އެމް.އޭ.ސީ.އެލުން ބުނެއެވެ.
ޗައިނާގެ ތިން އެއާލައިނަކުން މިހާރު ވެސް ރާއްޖެއަށް ދަތުރުތައް ކުރެއެވެ. އެއީ ބެއިޖިން ކެޕިޓަލް، ސިޗުއާން އެއަރލައިންސް އަދި ޗައިނާ އީސްޓަރންއެވެ.
